மலாக்கா மாநிலத் தேர்தலில் பாரிசான் நேஷனல் கூட்டணியின் பிரசாரப் பணிகளை வழிநடத்தும் தேர்தல் இயக்குநராக டத்தோ ஶ்ரீ அப்துல் ரவூஃப் யுசோ நியமிக்கப்பட்டுள்ளார்.
இதுவரை அந்தப் பொறுப்பில் இருந்த டத்தோ ஶ்ரீ முஹமட் ஹசானுக்குப் பதிலாக அப்துல் ரவூஃப் யுசோ நியமிக்கப்பட்டுள்ளார்.
இந்த நியமனத்துக்கு, நேற்றிரவு ஆயர் குரோவில் உள்ள மலாக்கா அனைத்துலக வர்த்தக மையத்தில் நடைபெற்ற கூட்டணியின் தலைமைத்துவக் கூட்டத்தில் ஒருமனதாக ஒப்புதல் அளிக்கப்பட்டதாக, பாரிசான் நேஷனல் தலைவர் டத்தோ ஶ்ரீ டாக்டர் அஹ்மாட் ஸாஹிட் ஹாமிடி தெரிவித்துள்ளார்.
மேலும், வெளியுறவு அமைச்சராகப் பொறுப்பு வகிக்கும் முஹமட் ஹசான், தேர்தல் பிரசாரக் காலத்தில் பல வெளிநாட்டுப் பயணங்களிலும் முக்கியக் கூட்டங்களிலும் பங்கேற்க வேண்டியிருப்பதால் இந்த மாற்றம் செய்யப்பட்டுள்ளதாக ஸாஹிட் ஹாமிடி குறிப்பிட்டுள்ளார்.
அவற்றில் காமன்வெல்த் மாநாட்டில் பங்கேற்பதும், வட்டாரக் கூட்டங்களில் மலேசியாவைப் பிரதிநிதித்துவப்படுத்துவதும் அடங்கும் என்றும் ஸாஹிட் ஹாமிடி தெரிவித்துள்ளார்.
