நாளை சனிக்கிழமை நடைபெறவிருக்கும் மலாக்கா மாநிலத் தேர்தலில் இளம் வாக்காளர்கள் முக்கியப் பங்கு வகிக்கக்கூடும் என பக்காத்தான் ஹராப்பான் மாநிலத் தலைவர் அட்லி ஸஹாரி தெரிவித்துள்ளார்.
தங்களது கூட்டணி நடத்திய ஆய்வில், மலாக்காவில் உள்ள இளம் வாக்காளர்களில் 68 விழுக்காட்டினர் நல்லாட்சி, நேர்மை மற்றும் நிர்வாகத்தில் வெளிப்படைத்தன்மை ஆகியவற்றுக்கு முக்கியத்துவம் அளிப்பதாக அவர் கூறினார்.
18 வயது மற்றும் அதற்கு மேற்பட்ட வாக்காளர்கள், தங்களின் வாக்குகள் மாநிலத்தின் எதிர்காலத்தைத் தீர்மானிப்பதில் கொண்டுள்ள முக்கியத்துவத்தை உணர வேண்டும் என்றும் அவர் வலியுறுத்தினார்.
மேலும், மலாக்காவுக்கு வெளியே வசிக்கும் வாக்காளர்கள், வெளிநாடுகளில் இருப்பவர்கள் உட்பட, வாக்களிப்பதற்காகத் திரும்பி வருவது சில தொகுதிகளின் தேர்தல் முடிவுகளில் தாக்கத்தை ஏற்படுத்தக்கூடும் என்றார்.
இத்தேர்தலில் 75 விழுக்காடு வாக்குப்பதிவை இலக்காகக் கொண்டுள்ளதாகவும், சில தொகுதிகளில் வாக்குப்பதிவு 80 விழுக்காட்டைக் கடக்கக்கூடும் என்றும் அட்லி ஸஹாரி தெரிவித்தார்.
நாளை நடைபெறவுள்ள மலாக்கா மாநிலத் தேர்தலில் மொத்தமுள்ள 28 சட்டமன்றத் தொகுதிகளில், 24 தொகுதிகளில் பக்காத்தான் ஹராப்பான் போட்டியிடுகிறது.
இத்தேர்தலில் இளம் வாக்காளர்கள் மற்றும் மாநிலத்திற்கு வெளியே வசிக்கும் வாக்காளர்களின் வாக்குகளும் முக்கியத்துவம் பெறும் என எதிர்பார்க்கப்படுகிறது.
