முன்னாள் பாடாங் ரெஙாஸ் நாடாளுமன்ற உறுப்பினர் நஸ்ரி அஸிஸ், 16-ஆவது பொதுத் தேர்தலில் மீண்டும் அத்தொகுதியில் போட்டியிட விருப்பம் தெரிவித்துள்ளார்.
கடந்த 2004-ஆம் ஆண்டு முதல் 2022-ஆம் ஆண்டு வரை தொடர்ந்து நான்கு தவணைகள் அத்தொகுதியைப் பிரதிநிதித்த முன்னாள் அம்னோ உச்சமன்ற உறுப்பினரான அவர், பாடாங் ரெஙாஸ் தொகுதி பாரம்பரியமாக பாரிசான் நேஷனல் கூட்டணிக்கே ஒதுக்கப்பட்டு போட்டியிடப்பட்டு வந்ததாக வலியுறுத்தியுள்ளார்.
தற்போது அந்தத் தொகுதியின் அம்னோ பிரிவுத் தலைவராகவும் இருக்கும் நஸ்ரி அஸிஸ், அமெரிக்காவுக்கான மலேசியத் தூதராகத் தனது பதவிக்காலத்தை நிறைவு செய்த பின்னர் மீண்டும் அத்தொகுதி மக்களைப் பிரதிநிதிக்க விரும்புவதாகத் தெரிவித்துள்ளார்.
கடந்த 2021-ஆம் ஆண்டு ஆகஸ்ட் மாதம் நஸ்ரி அஸிஸ் அரசியலில் இருந்து ஓய்வுபெறப் போவதாக அறிவித்திருந்தார்.
மேலும், இளம் தலைவர்களுக்கு வழிவிடும் நோக்கில் 15-ஆவது பொதுத் தேர்தலில் போட்டியிடப் போவதில்லை என்றும் அப்போது தெரிவித்திருந்தார் என்பது குறிப்பிடத்தக்கது.
