மலாக்கா தேர்தலில் பாரிசான் நேஷனல் 21 தொகுதிகளில் போட்டியிட வேண்டும் என்ற தனது நிலைப்பாட்டில் எந்த மாற்றமும் இல்லை என்று அதன் மாநிலத் தலைவர் டத்தோ ஶ்ரீ அப் ரவூஃப் யுசோ தெரிவித்துள்ளார்.
எனினும், சாத்தியமான கூட்டணிக் கட்சிகளுடன் தொகுதிப் பரிமாற்றம் குறித்து பேச்சு நடத்த பாரிசான் நேஷனல் தயாராக இருப்பதாக அவர் கூறினார். எந்தெந்த தொகுதிகளில் போட்டியிடுவது என்பதில் மாற்றம் இருக்கலாம் என்றாலும், மொத்தம் 21 தொகுதிகள் என்ற எண்ணிக்கையில் மாற்றம் இருக்காது என்றும் அப் ரவூஃப் தெரிவித்தார்.
சமூக ஊடகங்கள் மூலம் பல தரப்பினர் பாரிசான் நேஷனலுடன் இணைந்து செயல்பட விருப்பம் தெரிவித்துள்ளதாகவும், அவர்களுடன் கட்டம் கட்டமாக பேச்சு நடத்தப்படும் என்றும் அவர் கூறினார். தேர்தல் வேட்புமனுத் தாக்கல் நாளுக்கு முன்னதாக, பாரிசான் நேஷனலின் வியூக கூட்டாளிகள் அறிவிக்கப்படுவார்கள் என்றும் அவர் தெரிவித்தார்.
