அடுத்த 16ஆவது பொதுத்தேர்தலில் பக்காத்தான் ஹராப்பான் கட்சிகள் தத்தமது சின்னங்களில் போட்டியிட விரும்பினால், ஜசெக தனது ராக்கெட் சின்னத்தில் களமிறங்கத் தயாராக இருப்பதாக அதன் ஆலோசகர் லிம் குவான் எங் தெரிவித்துள்ளார்.
பினாங்கு ஜசெக நடத்திய தீபாவளி திறந்த இல்ல உபசரிப்பு நிகழ்ச்சியில் பேசிய அவர், இது தனது தனிப்பட்ட கருத்து என்றும், கட்சியின் அதிகாரப்பூர்வ நிலைப்பாடு அல்ல என்றும் தெளிவுபடுத்தினார்.
இதற்கிடையில், பிகேஆர் இளைஞர் பிரிவுத் தலைவர் கமில் முனிம், அடுத்த பொதுத்தேர்தலில் பக்காத்தான் ஹராப்பான் கூட்டணிக் கட்சிகள் தத்தமது சின்னங்களில் போட்டியிடுவது குறித்து தலைமைத்துவம் பரிசீலிக்க வேண்டும் என அண்மையில் தெரிவித்திருந்தார்.
கடந்த 14ஆவது பொதுத்தேர்தலில் ஜசெக தனது ராக்கெட் சின்னத்தைத் தவிர்த்து, தீபகற்ப மலேசியாவில் பிகேஆர் சின்னத்தில் போட்டியிட்டது. 2022ஆம் ஆண்டு நடைபெற்ற 15ஆவது பொதுத்தேர்தலில் பக்காத்தான் ஹராப்பான் சின்னத்தில் களமிறங்கியது.








