நெகிரி செம்பிலான் மாநில மந்திரி பெசாராக டத்தோ இஸ்மாயில் லாசிம் தொடர்ந்து பதவி வகிக்க வேண்டுமென்றால், மாநில சட்டமன்ற உறுப்பினர்களில் பெரும்பான்மையினரின் ஆதரவு இருப்பதை நிரூபிக்க வேண்டும் என்று ஜசெக மாநிலத் தலைவரும், நீலாய் சட்டமன்ற உறுப்பினருமான ஜே. அருள்குமார் தெரிவித்துள்ளார்.
இது நெகிரி செம்பிலான் மாநில அரண்மனை விதித்துள்ள நிபந்தனை என்பதையும் அவர் சுட்டிக் காட்டியுள்ளார்.
மேலும் பக்காத்தான் ஹராப்பானின் 11 சட்டமன்ற உறுப்பினர்களும், மாநிலத்தின் அரசியலமைப்பு மற்றும் நிர்வாக நெருக்கடிக்குத் தீர்வு காண அரண்மனை வகுத்துள்ள நடைமுறைக்கு ஆதரவு அளிப்பதாகவும் அருள் குமார் தெரிவித்துள்ளார்.
அதேவேளையில் பெரும்பான்மை ஆதரவு இல்லாமல் நிலையான அரசாங்கத்தை அமைக்க முடியாது என்றும், அரசியல் குழப்பம் நீடித்தால் பொருளாதாரமும், மக்களும் பாதிக்கப்படுவார்கள் என்றும் அவர் தெரிவித்துள்ளார்.








