மலாக்கா மாநிலத் தேர்தலில் இளம் மலாய் வாக்காளர்களில் பெரும்பாலானோர் பாரிசான் நேஷனல் மற்றும் பெரிக்கத்தான் நேஷனல் கூட்டணிகளுக்கு ஆதரவளித்திருந்தாலும், அவர்களின் ஆதரவை மீண்டும் பெற பாக்கத்தான் ஹராப்பானுக்கு வாய்ப்புள்ளதாக அரசியல் ஆய்வு மையம் தெரிவித்துள்ளது.
இல்ஹாம் செண்டர் தலைமைச் செயலதிகாரி ஹிசோமுசின் பாக்கார், இளைஞர்கள் தொடர்ந்து ஒரே அரசியல் அணிக்கு ஆதரவளிப்பவர்கள் அல்ல என்றும், அவர்களின் ஆதரவைப் பெற மற்ற கட்சிகளுக்கும் வாய்ப்புள்ளதாகவும் குறிப்பிட்டார்.
குறிப்பாக, பல்கலைக்கழகக் கல்வி பெற்ற இளம் மலாய்க்காரர்களையும் தொழில்நுட்ப மற்றும் தொழிற்பயிற்சிக் கல்வி பெற்ற இளைஞர்களையும் அரசியல் கட்சிகள் போதிய அளவில் அணுகவில்லை என்றார்.
இதற்கிடையில், சமூக ஊடகங்கள், குறிப்பாக டிக்டாக், இளம் வாக்காளர்களின் அரசியல் தெரிவுகளில் உணர்வுரீதியான தாக்கத்தை ஏற்படுத்துவதாகவும் ஆய்வாளர்கள் சுட்டிக் காட்டினர்.
மலாக்கா தேர்தலில் 18 முதல் 39 வயதுக்குட்பட்டவர்கள் மொத்தப் பதிவு செய்யப்பட்ட வாக்காளர்களில் 47.3 விழுக்காட்டினர் என்பது குறிப்பிடத்தக்கது.








