நெகிரி செம்பிலான் மாநில மந்திரி பெசாராக இஸ்மாயில் லாசிம் தொடர்ந்து வழக்கம் போல் தனது பணிகளை மேற்கொள்ள வேண்டும் என்று அம்மாநில ஆட்சியாளர் துவாங்கு முஹ்ரிஸ் துவாங்கு முனாவிர் உத்தரவிட்டுள்ளதாகத் தகவல்கள் கூறுகின்றன.
ஜுவாசே சட்டமன்ற உறுப்பினரான இஸ்மாயில் லாசிம், இந்த விவகாரம் தொடர்பாக, நேற்று மாலை ஆட்சியாளரைச் சந்தித்துப் பேசியதாகவும், சுமார் ஒரு மணி நேரத்திற்கும் மேலாக நீடித்த இந்தச் சந்திப்பின் போது, மந்திரி பெசார் பொறுப்பில் தொடர்ந்து இருந்து தனது பணிகளை வழக்கம் போல் மேற்கொள்ளுமாறு ஆட்சியாளர் அறிவுறுத்தியதாகவும் கூறப்படுகின்றது.
எனினும், இஸ்மாயில் லாசிமின் பதவி விலகல் கடிதத்தை ஆட்சியாளர் நிராகரித்தாரா? அல்லது அது குறித்து ஆராய்ந்து முடிவெடுக்க கூடுதல் அவகாசம் தேவைப்படுகிறதா? என்பது இன்னும் தெளிவான தகவல்கள் கிடைக்கப் பெறவில்லை.
இருப்பினும், இஸ்மாயில் லாசிம் தனது சமூக ஊடகப் பதிவுகளின்படி, மந்திரி பெசார் என்ற முறையில் தொடர்ந்து நிகழ்ச்சிகள் மற்றும் கூட்டங்களில் பங்கேற்று வருகிறார்.
இதற்கிடையில், பாரிசான் நேஷனல் கூட்டணி கடந்த திங்கட்கிழமை இஸ்மாயில் லாசிம் மந்திரி பெசார் பதவியிலிருந்து விலகியதாக அறிவித்தது.
அவருக்குப் பதிலாக புதிய மந்திரி பெசாரை நியமிப்பதற்கான வேட்பாளரின் பெயரை ஆட்சியாளரிடம் சமர்ப்பித்துள்ளதாக அக்கூட்டணியின் தலைவர் டத்தோ ஶ்ரீ அஹ்மாட் ஸாஹிட் ஹாமிடி தெரிவித்திருந்தார் என்பது குறிப்பிடத்தக்கது.








