நெகிரி செம்பிலான் மாநில மந்திரி பெசார் பதவியிலிருந்து தனது தந்தை இஸ்மாயில் லாசிம் விலகியதாக வெளியான அறிவிப்பு குறித்து, அவரது மகன் நைம் இஸ்மாயில் கேள்வி எழுப்பியுள்ளார்.
தனது தந்தை உண்மையிலேயே பதவி விலகல் அறிக்கையை வெளியிட்டாரா என்றும், அவ்வாறு இல்லையெனில் எந்த அடிப்படையில் கட்சி அவரது பதவி விலகலை அறிவித்தது என்றும் அவர் சமூக ஊடகப் பதிவில் கேள்வி எழுப்பியுள்ளார்.
பாரிசான் நேஷனல் பொதுச் செயலாளர் ஸம்ரி அப்துல் காடீர், நவம்பர் 16ஆம் தேதியிட்ட இஸ்மாயில் லாசிமின் பதவி விலகல் கடிதம் தமக்குக் கிடைத்துள்ளதாகவும், அது நெகிரி செம்பிலான் ஆட்சியாளர் துவாங்கு முஹ்ரிஸ் துவாங்கு முனாவிருக்கு அனுப்பப்பட்டதாகவும் தெரிவித்திருந்தார்.
இருப்பினும், அந்தக் கடிதத்தின் உண்மைத்தன்மை இன்னும் உறுதிப்படுத்தப்படவில்லை என்றும், ஆட்சியாளரின் ஒப்புதல் கிடைத்த பின்னரே பதவி விலகல் நடைமுறைக்கு வரும் என்றும் நெகிரி செம்பிலான் அரண்மனை தெரிவித்துள்ளது.
தனது தந்தை கட்சியின் அறிவுறுத்தல்களையே ஆரம்பம் முதல் பின்பற்றி வந்ததாகவும், சிலரின் தனிப்பட்ட நலன்களுக்காக அவரைப் பலிகடாவாக்கக் கூடாது என்றும் நைம் இஸ்மாயில் வலியுறுத்தியுள்ளார்.








