நெகிரி செம்பிலான் மாநில மந்திரி பெசார் டத்தோ இஸ்மாயில் லாசிம், அப்பதவியில் தொடர்ந்து நீடிப்பதற்கு மாநில சட்டமன்ற உறுப்பினர்களின் பெரும்பான்மை ஆதரவை நிரூபிக்க வேண்டும் என மாநில அரண்மனை தெரிவித்துள்ளது.
மேலும், மாநில ஆட்சியாளர் துவாங்கு முஹ்ரிஸ் துவாங்கு முனாவிரின் பரிசீலனைக்காக, புதிய மாநில ஆட்சிக்குழு உறுப்பினர்களின் பட்டியலையும் இஸ்மாயில் சமர்ப்பிக்க வேண்டும் என அறிவிக்கப்பட்டுள்ளது.
தாம் பதவி விலகல் கடிதத்தைச் சமர்ப்பிக்கவில்லை என்றும், அதனை அரண்மனைக்கு அனுப்ப ஒப்புதல் வழங்கவில்லை என்றும் இஸ்மாயில் லாசிம் தெரிவித்துள்ளதாக அரண்மனை குறிப்பிட்டுள்ளது.
எனவே, அவர் பதவியில் நீடிக்க வேண்டும் என ஆட்சியாளர் விரும்புவதாகக் கூறுவது உண்மைக்குப் புறம்பானது என்றும் விளக்கமளித்துள்ளது.
முன்னதாக, கடந்த நவம்பர் 16ஆம் தேதி இஸ்மாயில் லாசிம் பதவி விலகியதாக பாரிசான் நேஷனல் அறிவித்திருந்தது. எனினும், அந்தக் கடிதத்தின் உண்மைத்தன்மையை அரண்மனை இன்னும் உறுதிப்படுத்தவில்லை.
இந்நிலையில், மாநில நிர்வாகத்தின் தொடர்ச்சியை உறுதிப்படுத்தும் வகையில் இஸ்மாயில் லாசிம் தனது பொறுப்புகளைத் தொடர்ந்து ஆற்றுமாறு ஆட்சியாளர் உத்தரவிட்டுள்ளார்.








