பினாங்கு, ஜூன் 22-
பினாங்கு, நிபோங் தெபால் நாடாளுமன்றத் தொகுதிக்கு உட்பட்ட சுங்கை பக்காப் சட்டமன்றத் தொகுதி இடைத் தேர்தலில் பக்காத்தான் ஹராப்பானுக்கும், பெரிக்கத்தான் நேஷனலுக்கும் நேரடிப் போட்டி ஏற்பட்டுள்ளது.
இன்று காலையில் நடைபெற்ற வேட்புமனுத்தாக்கலில் அமினுதீன் பாக்கி கல்விக் கழகத்தின் வட பிராந்தியத்திற்கான முன்னாள் இயக்குநர் 60 வயது டாக்டர் ஜூஹாரி அரிஃபின், ஒற்றுமை அரசாங்கத்தின் சார்பில் பக்காத்தான் ஹராப்பான் வேட்பாளராக களம் இறக்கப்பட்டுள்ளார்.
பெரிக்காத்தான் நேஷனல் வேட்பாளராக பாஸ் கட்சியின் நிபோங் தெபால் தொகுதியின் உதவித் தலைவர் 56 வயது ஆபிதீன் இஸ்மாயில் போட்டியிடுகிறார்.
சுங்கை பக்காப் சட்டமன்றத்தொகுதி இடைத் தேர்தலுக்கான வேட்புமனுத்தாக்கல் இன்று காலையில் நிபோங் தெபால், டெவான் செர்பாகுனா ஜாவி மண்டபத்தில் நடைபெற்றது.
காலை 10.00 மணியுடன் வேட்புமனுத்தாக்கல் முடிவடைந்து, தேர்தல் நிர்வாக அதிகாரி கைருல்நிஸாம் ஹாஷிம், இந்த இடைத் தேர்தலில் போட்டியிடக்கூடிய வேட்பாளர்களின் பெயர்களை அதிகாரப்பூர்வமாக அறிவித்தார்.
இருவர் மட்டுமே வேட்புமனுத்தாக்கல் செய்த நிலையில் எந்தவொரு வேட்பாளரின் வேட்புமனுவும் நிராகரிக்கப்படவில்லை. முன்னாதாக, பக்காத்தான் ஹராப்பான் மற்றும் பெரிக்காத்தான் நேஷனல் ஆகியவற்றின் ஆதரவாளர்கள் தங்கள் கட்சி கொடிகளை ஏந்திக்கொண்டு தத்தம் வேட்பாளருடன் புடை சூழ வேட்புமனுத்தாக்கல் மையத்திற்கு வந்திருந்திருந்தனர்.
இந்த இடைத் தேர்தலுக்கான வாக்களிப்பு வரும் ஜுலை 2 ஆம் தேதி நடைபெறுகிறது. கடந்த மூன்று தவணைகாலம் பக்காத்தான் ஹராப்பான் கைவசம் இருந்த சுங்கை பக்காப் சட்டமன்றத் தொகுதி, கடந்த ஆண்டு ஆகஸ்ட் மாதம் நடைபெற்ற சட்டமன்றத் தேர்தலில், பெரிக்காத்தான் நேஷனல் சார்பில் போட்டியிட்ட பாஸ் கட்சி வேட்பாளர் நோர் ஜம்ரி லத்தீஃப் கைப்பற்றினார். கடந்த மே 24 ஆம் தேதி அவர் காலமானதைத் தொடர்ந்து இந்த இடைத் தேர்தல் நடைபெறுகிறது..
இந்த இடைத் தேர்தலில் 39 ஆயிரத்து 279 பதிவு பெற்ற வாக்காளர்கள், வாக்களிப்பதற்கு தகுதி பெற்றுள்ளனர்.
