மலாக்கா மாநிலத் தேர்தலில் புதிய வாக்குறுதிகளைக் கூறி மக்களை ஏமாற்ற வரவில்லை; ஏற்கெனவே தொடங்கப்பட்டுள்ள மக்கள் நலத் திட்டங்களையும் மேம்பாட்டுப் பணிகளையும் தொடர்ந்து நிறைவேற்ற பக்காத்தான் ஹராப்பானுக்கு மீண்டும் வாய்ப்பளிக்குமாறு பிரதமர் டத்தோ ஸ்ரீ அன்வார் இப்ராஹிம் மலாக்கா மக்களிடம் வேண்டுகோள் விடுத்துள்ளார்.
மலாக்கா, புக்கிட் ரம்பாய், தாமான் புக்கிட் ரம்பாயில் நடைபெற்ற மடானி மக்கள் சந்திப்பு நிகழ்ச்சியில் உரையாற்றியபோது அவர் இதனைத் தெரிவித்தார்.
மலாக்காவின் வளர்ச்சியை விரைவுபடுத்த மத்திய அரசாங்கத்திற்கும் மாநில அரசாங்கத்திற்கும் இடையே வலுவான ஒத்துழைப்பு அவசியம் எனக் குறிப்பிட்ட அன்வார், வறுமை ஒழிப்பு, மக்களின் வருமான உயர்வு, குடும்பங்களுக்கான நிதியுதவி மற்றும் கல்வி வசதிகளை மேம்படுத்தும் திட்டங்கள் தடையின்றித் தொடர வேண்டும் என்றார்.
அதேவேளையில், குடிநீர், மின்சாரம், வடிகால் பராமரிப்பு, சாலைகள் மற்றும் பள்ளிகளின் அடிப்படை வசதிகள் தொடர்பான மக்களின் பிரச்சினைகள் இன்னும் முழுமையாகத் தீர்க்கப்பட வேண்டியுள்ளதாகவும் அவர் ஒப்புக் கொண்டார்.
அரசாங்கத்தின் செயல்பாடுகளை மதிப்பிடுவதற்கும், தங்களது எதிர்பார்ப்புகளை முன்வைப்பதற்கும் மக்களுக்கு முழு உரிமை உண்டு என்றும் அவர் வலியுறுத்தினார்.
எனவே, மலாக்காவின் எதிர்காலத்தைத் தீர்மானிக்கும் இந்தத் தேர்தலில், ஏற்கெனவே தொடங்கப்பட்டுள்ள வளர்ச்சித் திட்டங்கள் முழுமையடையவும், மத்திய அரசாங்கத்துடன் இணைந்து செயல்படக்கூடிய மாநில நிர்வாகம் அமையவும் பக்காத்தான் ஹராப்பானுக்கு மக்கள் ஆதரவளிக்க வேண்டும் என்பதே பிரதமரின் முக்கிய வேண்டுகோளாக அமைந்துள்ளது.
