மலாக்கா மாநிலத்தின் மச்சாப் ஜெயா சட்டமன்றத் தொகுதியில் நான்காவது முறையாகப் போட்டியிடும் பக்காத்தான் ஹராப்பான் வேட்பாளர் டத்தோ ஜினி லிம் சியூ லின் (Datuk Ginie Lim Siew Lin), இளைஞர்களுக்குப் புதிய வேலை வாய்ப்புகளை உருவாக்குவது, நவீன விவசாயம் மற்றும் கால்நடை வளர்ப்பை ஊக்குவிப்பது உள்ளிட்ட நான்கு முக்கியத் திட்டங்களை முன்வைத்துள்ளார்.
மக்களின் தேவைகளை அடிப்படையாகக் கொண்டு, அடுத்த ஐந்து ஆண்டுகளில் மக்கள் சேவையை மேம்படுத்துவதே தமது இலக்கு என அவர் தெரிவித்துள்ளார்.
மக்களுடன் நேரடித் தொடர்பை வலுப்படுத்துதல், பாதுகாப்பான குடியிருப்புச் சூழலை உருவாக்குதல், பெண்கள் மற்றும் மூத்த குடிமக்களின் நலனை மேம்படுத்துதல் ஆகியவையும் அவரது திட்டங்களில் இடம்பெற்றுள்ளன.
குறிப்பாக, தனியார் நிறுவனங்கள் மற்றும் கல்வி நிறுவனங்களுடன் இணைந்து நவீன விவசாயம், கால்நடை வளர்ப்பு மற்றும் புதிய தொழில்துறை வாய்ப்புகளை உருவாக்கத் திட்டமிட்டுள்ளார்.
இதன் மூலம் மச்சாப் ஜெயா இளைஞர்கள் வேலை வாய்ப்புகளைத் தேடி மாநிலத்தைவிட்டு வெளியேறாமல், சொந்த மண்ணிலேயே வேலை பெறுவதற்கான வாய்ப்புகளை உருவாக்க முடியும் என டத்தோ ஜினி லிம் நம்பிக்கை தெரிவித்துள்ளார்.
