சிலாங்கூர், கோலகுபு பாரு சட்டமன்றத் தொகுதியில் மூடா கட்சி சார்பில் அதன் சிலாங்கூர் மாநில துணைத் தலைவர் டாக்டர் ரா. சிவபிரகாஷ் போட்டியிடுகிறார். ஒரு கல்விமானாகிய டாக்டர் சிவபிரகாஷ், கோலகுபுபாரு தொகுதியில் நான்கு முனைப் போட்டியை எதிர்நோக்கியுள்ளார்.
டாக்டர் சிவபிரகாஷை எதித்த்து டிஏபி யை சேர்ந்த பக்காத்தான் ஹராப்பான் வேட்பாளர் ஙங் ஷே ஹன், பெரிக்காத்தான் நேஷனல் வேட்பாளர் தியோ கியென் ஹோங் உட்பட நால்வர் போட்டியிடுகின்றனர். உலு சிலாங்கூர் நாடாளுமன்றத் தொகுதியின் மூடா கட்சியின் ஒருங்கிணைப்பாளரான டாக்டர் சிவபிரகாஷ், இன்று காலை 9 மணியளவில் தமது அதரவாளர்கள் புடை சூழ கோலகுபுபாரு, டேவான் செர்பாகுனா கோலகுபுபாரு சமூக மண்டபத்தில் தமது வேட்புமனுத்தாக்கலை செய்தார்.
கடந்த மூன்று ஆண்டு காலமாக கோல குபு பாருவை உள்ளடக்கிய உலு சிலாங்கூர் தொகுதியில் சேவையாற்றி வரும் ஒரு பட்டதாரியுமான டாக்டர் சிவபிரகாஷ, ஒரு இடியாப்பக்கார வியாபாரியின் மகன் என்பதால் சாமானிய மக்களின் பிரச்னை என்ன என்பதை உணர்ந்துள்ளதாக குறிப்பிட்டார். கோலகுபு பாரு தொகுதியில் தாம் வெற்றி பெற்றால் சாமானிய மக்களின் அடிப்படைப் பிரச்னைகளுக்கு தீர்வு காண்பதே தமது தலையாய கடமையாகும் என்று வேட்புமனுத்தாக்கலுக்கு பின்னர் செய்தியாளர்களிடம் பேசுகையில் அவர் இதனை தெரிவித்தார்.
