நெகிரி செம்பிலான் மாநில ஆட்சிக்குழு உறுப்பினர்கள் 10 பேரின் பதவிகள் ரத்து செய்யப்பட்டுள்ள நிலையில், அவர்களுக்கு வழங்கப்பட்டிருந்த அதிகாரப்பூர்வ வாகனங்களைத் திரும்ப ஒப்படைக்குமாறு உத்தரவிடப்பட்டுள்ளது.
இதற்கான கடிதம் தமக்கு இன்று கிடைத்ததாக, லெங்கெங் சட்டமன்ற உறுப்பினர் டத்தோ முஹமட் அஸ்னா அமீன் தெரிவித்தார்.
தமக்கு வழங்கப்பட்ட கடிதத்தை முன்னதாக முழுமையாகப் படிக்கவில்லை என்றாலும், வாகனங்களைத் திரும்ப ஒப்படைக்குமாறு கூறப்பட்டுள்ளதால், அவற்றில் உள்ள தமது தனிப்பட்ட பொருட்களை அகற்றிவிட்டு வாகனங்களை ஒப்படைக்கப் போவதாக அவர் கூறினார்.
தற்போது தமது லெங்கெங் தொகுதி சேவை மையத்திலிருந்தே பெரும்பாலும் பணிகளை மேற்கொண்டு வருவதாகவும் முஹமட் அஸ்னா தெரிவித்தார்.
மாநில ஆட்சிக்குழு உறுப்பினர்கள் விஸ்மா நெகிரியில் உள்ள தங்களது அலுவலகங்களுக்குள் நுழைய வாய்மொழி உத்தரவு மூலம் தடை விதிக்கப்பட்டுள்ளதாக மந்திரி பெசார் டத்தோ இஸ்மாயில் லாசிம் கடந்த வாரம் தெரிவித்திருந்தார்.
