வரும் நவம்பர் 14-ஆம் தேதி நடைபெறவுள்ள மலாக்கா மாநிலத் தேர்தலுக்கான தொகுதிப் பங்கீட்டுப் பிரச்சினையைத் தீர்க்கும் பாரிசான் நேஷனல் முயற்சிகளில் ஜசெக தலையிட வேண்டாம் என இரு மசீச தலைவர்கள் எச்சரித்துள்ளனர்.
இது குறித்து மசீச பொதுச் செயலாளர் சோங் சின் வூன் கூறுகையில், இந்த விவகாரத்தைத் தீர்க்க பாரிசான் நேஷனலுக்குத் தனிப்பட்ட வழிமுறைகள் இருப்பதாகக் குறிப்பிட்டுள்ளார்.
அதேவேளையில், மசீச இளைஞர் பிரிவுத் துணைத் தலைவர் மைக் சோங் கூறுகையில், தங்களது அரசியல் முடிவுகளைத் தீர்மானிக்க ஜசெகவின் உதவி தேவையில்லை என்றும் தெரிவித்துள்ளார்.
மேலும், மலாக்காவில் பெர்சத்துவுடன் கூட்டணி அமைப்பது தொடர்பாக பக்காத்தான் ஹராப்பான் தலைவர்களிடையே கருத்து வேறுபாடுகள் நிலவுவதால், ஜசெக தனது உள்கட்சி விவகாரங்களில் கவனம் செலுத்த வேண்டும் என சோங் சின் வலியுறுத்தியுள்ளார்.
பெர்சத்துவுடன் ஒத்துழைப்பு இல்லை என மலாக்கா ஜசெக தலைவர்கள் ஏற்கெனவே தெரிவித்துள்ள நிலையில், தற்போதைய நிலைமை அவர்களுக்கு சங்கடத்தை ஏற்படுத்தியுள்ளதாகவும் அவர் குறிப்பிட்டுள்ளார்.
