மலாக்கா மாநிலத் தேர்தலில், கடந்த 2021-ஆம் ஆண்டு ஒன்பது தொகுதிகளில் போட்டியிட்ட அமானா கட்சிக்கு, இம்முறை ஐந்து தொகுதிகள் மட்டுமே ஒதுக்கப்பட்டுள்ளதை அக்கட்சி ஏற்றுக் கொண்டுள்ளது.
பக்காத்தான் ஹராப்பான் கூட்டணியின் இந்த முடிவுக்குக் கட்டுப்படுவதாக அமனாவின் வியூக இயக்குநர் டத்தோ ஶ்ரீ டாக்டர் சுல்கிஃப்லி அஹ்மாட் தெரிவித்துள்ளார்.
தொகுதிப் பங்கீடு தொடர்பாக கூட்டணிக் கட்சிகளிடையே பேச்சுவார்த்தை நடத்தப்பட்டு முடிவு எடுக்கப்பட்டதாக அவர் குறிப்பிட்டுள்ளார்.
கடந்த 2015-ஆம் ஆண்டு முதல் பக்காத்தான் ஹராப்பான் கூட்டணியில் இடம் பெற்றுள்ள அமானா, எப்போதும் கூட்டணியாக இணைந்து செயல்பட்டு தேர்தல் பிரசாரங்களை முன்னெடுத்து வருவதாகவும் தெரிவித்துள்ளார்.
மேலும், கூட்டணியின் உயர்மட்டத் தலைவர்கள் முழுமையான ஆலோசனை மற்றும் பேச்சுவார்த்தைக்குப் பிறகு எடுக்கும் முடிவுகளை அனைத்து கூட்டணிக் கட்சிகளும் ஏற்றுக் கொள்ளும் என அவர் விவரித்துள்ளார்.
இன்று ஞாயிற்றுக்கிழமை நடைபெற்ற 2026-ஆம் ஆண்டுக்கான தேசிய உலக மனநல தினக் கொண்டாட்டத்தைத் தொடங்கி வைத்த பின்னர் செய்தியாளர்களிடம் சுல்கிஃப்லி அஹ்மாட் இதனைத் தெரிவித்துள்ளார்.
