மலாக்கா மாநிலத் தேர்தலில், பாயா ரும்புட் தொகுதியில் வெற்றிபெறும் வேட்பாளர்கள், இந்திய சமூகத்தின் வேலைவாய்ப்பு மற்றும் வழிபாட்டுத் தலங்களின் பராமரிப்புப் பிரச்சினைகளுக்குத் தீர்வு காண வேண்டும் என அப்பகுதி இந்தியர்கள் கோரிக்கை விடுத்துள்ளனர்.
மேலும், மலாக்கா மாநிலத்தின் ஊதியத்தை ஜோகூர் மாநிலத்திற்கு இணையான நிலைக்கு உயர்த்தி, உள்ளூர் இளைஞர்கள் வேலை தேடி வெளியேறுவதைத் தடுக்க வேண்டும் என்றும் அவர்கள் வலியுறுத்தியுள்ளனர்.
அத்துடன், பள்ளி மாணவர்களின் கல்வி மற்றும் வாழ்க்கைத் தரத்தை மேம்படுத்தும் திட்டங்களையும் தேர்தலில் வெற்றி பெறும் பிரதிநிதிகள் அறிமுகப்படுத்த வேண்டும் என்றும் அவர்கள் கேட்டுக் கொண்டுள்ளனர்.
இதனிடையே, வேலைவாய்ப்பு மற்றும் ஊதியப் பிரச்சினைகளைத் தவிர, பாயா ரும்புட் தொகுதியில் உள்ள இந்து வழிபாட்டுத் தலங்களின் நலன் மற்றும் பராமரிப்புக்கும் புதிதாகத் தேர்ந்தெடுக்கப்படும் மக்கள் பிரதிநிதி உரிய கவனம் செலுத்த வேண்டும் என்றும் அப்பகுதி இந்திய சமூகத்தினர் எதிர்பார்க்கின்றனர்.
