புதிய அரசியல் கூட்டணி அமைக்கத் திட்டமிட்டுள்ளதால் 'பெர்சத்து' (Bersatu) கட்சி 'பெரிக்காத்தான் நேஷனல்' கூட்டணியில் இருந்து தானாகவே வெளியேறி விட்டது என்ற பாஸ் கட்சியின் தலைவர் அப்துல் ஹாடி அவாங்கின் கூற்று தவறானது என்று பெர்சத்து பொதுச் செயலாளர் அஸ்மின் அலி தெரிவித்துள்ளார்.
கூட்டணியின் விதிமுறைப்படி எந்தவொரு கட்சியும் தானாக வெளியேற முடியாது என்றும், கட்சியின் உறுப்பினர் அந்தஸ்து குறித்து அதன் தலைவர் மன்றமே இறுதி முடிவு எடுக்க வேண்டும் என்றும் அவர் தெளிவுபடுத்தியுள்ளார். இதுவரை அது போன்ற கூட்டம் எதுவும் நடைபெறாததால், பெர்சத்து இன்னும் கூட்டணியின் அங்கீகரிக்கப்பட்ட அங்கமே என்று அஸ்மின் அலி வலியுறுத்தியுள்ளார்.
பெரிக்காத்தான் கூட்டணி என்பது பாஸ் கட்சியின் ஒரு கிளை அல்ல என்று கூறியுள்ள பெர்சத்து தகவல் தொடர்புத் தலைவர் துன் பைசல், பெரிக்காத்தான் நேஷனல் விதிமுறைகளை மீறி தங்களை தொகுதிப் பங்கீட்டுக் கூட்டத்தில் பங்கேற்க விடாமல் தடுத்தது குறித்து சங்கங்களின் பதிவிலாகாவிடம் புகார் அளிக்கப்படும் என்றும் கூறியுள்ளார்.
