டிசம்பர் – 01
வரும் தேர்தலில் வெற்றி பெறுவதற்கு, தேசிய முன்னணி, நம்பிக்கைக் கூட்டணி உறுப்பு கட்சிகளின் அரசியல் ஆதரவைப் பெற வேண்டும் என்று தேசிய முன்னணியின் தலைவர் டத்தோஸ்ரீ அகமட் சாஹிட் ஹமிடி கூறியுள்ளார்.
நாட்டின் அரசியல் சூழல் மாறிவிட்டதால், தேசிய முன்னணியின் உறுப்பு கட்சிகளின் ஆதரவை மட்டும் நம்பி இருக்க முடியாது என்றும் அவர் கூறினார்.
புதிய யதார்த்தம் என்னவென்றால், நம்பிக்கைக் கூட்டணியில் உள்ள நம் நண்பர்களும், அவர்களின் உறுப்பினர்களும், ஆதரவாளர்களும் தேசிய முன்னணி முன்னிறுத்தும் வேட்பாளர்களின் வெற்றிக்கு முக்கிய காரணியாக இருப்பார்கள் என்று அவர் கூறினார்.
இன்று நடைபெற்ற சிலாங்கூர் மாநில தேசிய முன்னணி மாநாட்டிற்குப் பிறகு செய்தியாளர்களிடம் பேசிய அவர் இவ்வாறு கூறினார்.
முன்னதாக, அவர் அம்னோ தலைவராகவும் இருப்பதால், அனைத்து கூட்டணி கட்சிகளும் இந்த அரசியல் யதார்த்தத்தை ஏற்றுக்கொள்ள வேண்டும் என்றும் அவர் கூறினார்.
அதேபோல், மஇகா, மசீச ஆகிய கட்சிகள் சிலாங்கூரில் உள்ள பிற இன மக்களின் பிரச்சினைகளை சேர்ந்து தீர்க்கும் வகையில், DAP கட்சியுடன் நல்ல ஒத்துழைப்பை ஏற்படுத்த வேண்டும் என்றும் அவர் கேட்டுக்கொண்டார்.
இந்த இலக்கை அடைவதன் மூலம், பல்வேறு இன மக்களின் போராட்டத்திற்கானத் தளமாக தேசிய முன்னணியை மாற்றி, வரும் தேர்தலில் வெற்றி பெற விரும்புகிறோம் என்றும் அவர் கூறினார்.
தேசிய முன்னணியின் பாரம்பரிய வாக்காளர்களை மட்டுமல்லாமல், இளைஞர்களிடையேயும் அதிக கவனம் செலுத்தப்பட வேண்டும் எனவும் அவர் குறிப்பிட்டார்.
