மலாக்கா மாநிலத் தேர்தலில் மசீசவின் நான்கு வேட்பாளர்களும், ஜசெகவின் நான்கு வேட்பாளர்களும் பொது விவாவதத்தில் பங்கேற்க வேண்டும் என்று மலாக்கா மாநில ஜசெக தலைவர் கூ பொயே தியோங் சவால் விடுத்துள்ளார்.
நான்குக்கு நான்கு என்ற நிலையில் இரு கட்சிகளின் வேட்பாளர்களும் பொது விவாதத்தில் கலந்து கொள்ள ஏற்பாடு செய்யப்படுமானால் பொது விவாதத்தை எதிர்கொள்ள ஜசெக தயாராக இருக்கிறது. இதன் மூலம் இரு கட்சிகளின் நிலையையும் வாக்காளர்கள் மதிப்பீடு செய்ய முடியும் என்று இன்று மலாக்காவில் புக்கிட் பியாதுவில் உள்ள பக்காத்தான் ஹராப்பான் தேர்தல் நடவடிக்கை மையத்தில் நடைபெற்ற செய்தியாளர்கள் கூட்டத்தில் பேசுகையில் கூ பொயே தியோங் இதனைத் தெரிவித்தார்.
ஜசெகவின் ஒரு வேட்பாளரை மட்டும் மசீச பொது விவாதத்திற்கு அழைப்பதற்குப் பதிலாக, இரு கட்சிகளின் நான்கு வேட்பாளர்களும் நேருக்கு நேர் விவாதிக்க மசீச முன்வர வேண்டும் என்றார். விவாதத்தை மலாய் அல்லது சீன மொழியில் நடத்த ஜசெக தயாராக இருப்பதாகவும், இருப்பினும் மலாய் மொழியில் விவாதம் நடத்துவதே சிறந்தது என்றும் அவர் குறிப்பிட்டார்.
மலாய் மொழியில் விவாதம் நடத்தினால், மசீசவின் உண்மையான அரசியல் நிலைப்பாட்டை நாட்டு மக்கள் அறிந்து கொள்ள முடியும் என்றும், மலாய் மற்றும் சீன மொழிகளில் வெவ்வேறு நிலைப்பாடுகளை முன்வைக்கும் மசீசவின் அணுகுமுறையை மக்களும் தெரிந்து கொள்ள முடியும் என்றும் கூ பொயே தியோங் தெரிவித்தார்.
இச்சந்திப்பில் ஜசெக. தேசிய அரசியல் கல்விப் பிரிவு இயக்குநரும், ஈப்போ திமோர் நாடாளுமன்ற உறுப்பினருமான ஹாவர்ட் லீ சுவான் ஹோவ்வும் உடனிருந்தார்.
