மசீச உதவித் தலைவர் லிம் பான் ஹோங், வரும் நவம்பர் 14-ஆம் தேதி நடைபெறவுள்ள மலாக்கா மாநிலத் தேர்தலில், கிளேபாங் சட்டமன்றத் தொகுதியில் மூன்றாவது முறையாக வெற்றி பெறும் நோக்கில் களமிறங்குகிறார்.
இத்தொகுதியில் அவருக்கு நான்கு முனைப் போட்டி நிலவுகிறது.
பாரிசான் நேஷனல் சார்பில் போட்டியிடும் லிம் பான் ஹோங்கை எதிர்த்து, பக்காத்தான் ஹராப்பான் சார்பில் ஃபார்ஸானா ஹயானி நாசீர், பெர்சத்து கட்சியைச் சேர்ந்த முன்னாள் மேலவை துணைத் தலைவர் அலி முஹமட், பெர்சாமா கட்சியின் யங் ஜீ யு ஆகியோர் போட்டியிடுகின்றனர்.
மேலும், கிளேபாங் தொகுதியில் மலாய் வாக்காளர்கள் 66.9 விழுக்காட்டினரும், சீன வாக்காளர்கள் 28.6 விழுக்காட்டினரும், இந்திய வாக்காளர்கள் 2.3 விழுக்காட்டினரும் உள்ளனர்.
லிம் பான் ஹோங் கடந்த 2013-ஆம் ஆண்டு முதன்முறையாக கிளேபாங் சட்டமன்ற உறுப்பினராகத் தேர்ந்தெடுக்கப்பட்டார். எனினும், 2018-ஆம் ஆண்டு நடைபெற்ற தேர்தலில் பிகேஆர் கட்சியிடம் அத்தொகுதியை இழந்தார்.
இதனையடுத்து, 2021-ஆம் ஆண்டு நடைபெற்ற மாநிலத் தேர்தலில் மீண்டும் போட்டியிட்டு, அப்போது பிகேஆர் சார்பில் பதவி வகித்த சட்டமன்ற உறுப்பினரை 876 வாக்குகள் பெரும்பான்மையில் தோற்கடித்து தொகுதியைக் கைப்பற்றினார் என்பது குறிப்பிடத்தக்கது.
