நெகிரி செம்பிலான் மாநில சட்டமன்றத்தின் அடுத்த கூட்டத்தொடர் நடைபெறும் தேதிக்கு, மாநில ஆட்சியாளர் யாங் டிபெர்துவான் பெசார் துவாங்கு முஹ்ரிஸின் ஒப்புதலை இன்னும் பெறவில்லை என்று மந்திரி பெசார் டத்தோ இஸ்மாயில் லாசிம் தெரிவித்துள்ளார்.
முன்னதாக, நவம்பர் 26ஆம் தேதி சட்டமன்றக் கூட்டத்தொடரையும், மறுநாள் நவம்பர் 27ஆம் தேதி மாநில வரவு செலவுத் திட்டத்தையும் தாக்கல் செய்யத் திட்டமிடப்பட்டிருந்தது. இதற்கான ஒப்புதலைப் பெறும் முயற்சி நடைபெற்று வருவதாக அவர் கூறினார்.
நேற்று சிரம்பானில் நடைபெற்ற பெர்பாத்தே ஃபெஸ்ட் நிகழ்ச்சிக்குப் பின்னர் செய்தியாளர்களிடம் பேசிய இஸ்மாயில் லாசிம், நவம்பர் 27ஆம் தேதி அல்லது அதையொட்டிய நாளில் கூட்டத்தொடர் நடைபெறலாம் என்றார்.
இதற்கிடையில், ஆட்சியாளரின் ஒப்புதல் கிடைத்திருந்தால் சட்டமன்ற உறுப்பினர்களுக்கு அதிகாரபூர்வ அறிவிப்பு வழங்கப்பட்டிருக்க வேண்டும் என்றும், எதிர்க்கட்சி உறுப்பினர்களுக்கு இதுவரை அறிவிப்பு கிடைக்கவில்லை என்றும் நீலாய் சட்டமன்ற உறுப்பினர் ஜே. அருள் குமார் தெரிவித்திருந்தார்.
