நெகிரி செம்பிலான் யாங் டி-பெர்துவான் பெசாரின் பதவி தொடர்பான விவகாரத்தில் தாம் தலையிடப் போவதில்லை என்று பிரதமர் டத்தோ ஸ்ரீ அன்வார் இப்ராஹிம் திட்டவட்டமாகத் தெரிவித்துள்ளார்.
அரசக் குடும்பம் தொடர்பான எந்தவொரு சர்ச்சையும் கூட்டரசு அரசமைப்புச் சட்டம், மாநில அரசமைப்புச் சட்டம் மற்றும் சட்டத்தின் அடிப்படையில் தீர்க்கப்பட வேண்டும் என்றும் அவர் கூறினார்.
மலேசியா அரசமைப்பு முடியாட்சியைப் பின்பற்றுவதால், ஓர் ஆட்சியாளரை பதவியிலிருந்து அகற்றுவது போன்ற நடவடிக்கைகளைத் தன்னிச்சையாக மேற்கொள்ள முடியாது என்றும் அன்வார் வலியுறுத்தினார்.
நெகிரி செம்பிலானின் நான்கு உண்டாங் தலைவர்கள் எடுத்துள்ள முடிவு செல்லத்தக்கதா, செல்லத்தக்கதல்லதா என்பதை உரிய நடைமுறையில் தீர்க்க வேண்டும் என்றும் அவர் தெரிவித்தார்.
ஆட்சியாளரை எளிதில் பதவியிலிருந்து அகற்றும் நடவடிக்கையை தாம் ஏற்கவில்லை என்றும், இந்த விவகாரம் நல்ல முறையில் பேசி தீர்க்கப்பட வேண்டும் என்றும் அன்வார் கூறினார்.
பிரதமர் மற்றும் அமைச்சரவைக்குக்கூட அரசமைப்புச் சட்டம் வரையறுத்துள்ள அதிகார வரம்புகள் உள்ளன என்றும், மலாய் ஆட்சியாளர்கள் தொடர்பான அரசமைப்புச் சட்ட விதிகளை தன்னிச்சையாக மாற்ற முடியாது என்றும் பிரதமர் தெரிவித்தார்.
