கிராமப்புற மேம்பாட்டுத் திட்டங்கள் ரத்து செய்யப்பட்டதாகத் துணைப் பிரதமர் டத்தோ ஶ்ரீ அஹ்மாட் ஸாஹிட் ஹாமிடி வெளியிட்ட கருத்து, மடானி அரசாங்கத்தைச் சீர்குலைக்கும் முயற்சி என ஜசெக. நாடாளுமன்ற உறுப்பினர் ஆர்எஸ்என் ராயர் குற்றம்சாட்டியுள்ளார்.
சபா, சரவாக் மாநிலங்களில் 2026ஆம் ஆண்டுக்கான சில கிராமப்புற மேம்பாட்டுத் திட்டங்கள் ரத்து செய்யப்பட்டதாக ஸாஹிட் கூறியிருந்தார். ஆனால், நிதி அமைச்சர் எந்த நிதியும் குறைக்கப்படவில்லை என விளக்கமளித்துள்ளதாக ராயர் தெரிவித்தார்.
இதனால் அரசாங்கத்தின் மீது மக்களிடையே அதிருப்தி ஏற்பட்டுள்ளதாகவும் அவர் கூறினார்.
இதற்கு எதிர்ப்பு தெரிவித்த பெரிக்காத்தான் நேஷனல் நாடாளுமன்ற உறுப்பினர் ஷாஹிடான் காசிம், துணைப் பிரதமர் மீது முன்வைக்கப்பட்ட குற்றச்சாட்டைத் திரும்பப் பெறுமாறு வலியுறுத்தினார்.
இதற்கிடையில், சபாநாயகர் ஜொஹாரி அப்துல், இந்த விவகாரத்தை நாடாளுமன்ற உரிமைகள் மற்றும் சுதந்திரக் குழுவின் விசாரணைக்கு அனுப்ப விரும்பினால், முறையான தீர்மானத்தைச் சமர்ப்பிக்குமாறு ராயரிடம் கேட்டுக் கொண்டார்.
