மலாக்கா தேர்தலில் தொகுதிப் பங்கீடு தொடர்பாக தேசிய முன்னணித் தலைவர்களுடன் பேச்சுவார்த்தை நடத்திய போதிலும், மசீச தனது இறுதி நிலைப்பாட்டை இன்னும் முடிவு செய்யவில்லை என்று அதன் தலைவர் டத்தோ ஸ்ரீ டாக்டர் வீ கா சியோங் தெரிவித்துள்ளார்.
தேசிய முன்னணித் தலைவர் டத்தோ ஸ்ரீ டாக்டர் அஹ்மட் ஸாஹிட் ஹமிடி, பேச்சுவார்த்தையின் முடிவு சாதகமாக இருப்பதாகக் கூறியிருந்தாலும், அந்த இலக்கை எட்டுவதற்கு இன்னும் நீண்ட தூரம் செல்ல வேண்டியுள்ளது என்று அவர் குறிப்பிட்டார்.
கடந்த திங்கட்கிழமை இரவு நடைபெற்ற பேச்சுவார்த்தை சுமுகமாக அமைந்ததாகவும், மலாக்கா சட்டமன்றத் தேர்தலுக்கான தொகுதிப் பங்கீட்டில் மசீச தனது அதிருப்தியைத் தெளிவாகத் தெரிவித்ததாகவும் வீ கா சியோங் கூறினார்.
தேசிய முன்னணியின் பொதுச் செயலாளர் டத்தோ ஸ்ரீ டாக்டர் ஸாம்ப்ரி அப்துல் காதிர், மலாக்கா முதலமைச்சர் டத்தோ ஸ்ரீ அப்துல் ரவூஃப் யூசோ ஆகியோர் தம்மையும் மற்றொரு மசீச தலைவரையும் இரவு 11 மணியளவில் சந்தித்ததாகவும், மறுநாள் அதிகாலை 1 மணியளவில் பேச்சுவார்த்தை நிறைவடைந்ததாகவும் அவர் தெரிவித்தார்.
