மலாக்கா மாநிலத் தேர்தலின் முதற்கட்ட தேர்தல் முடிவுகளானது இன்று இரவு 9.30 மணிக்குள் வெளியாகும் என்றும், அனைத்து தொகுதிகளுக்குமான முழுமையான முடிவுகள் நள்ளிரவு 12.30 மணிக்கு முன்பாக அறிவிக்கப்படும் என்றும் தேர்தல் ஆணையத் தலைவர் டத்தோ ஶ்ரீ ரம்லான் ஹாருன் அறிவித்துள்ளார்.
எஸ்ஜேகே (சி) மாலிம் வாக்குச்சாவடியில் ஆய்வு மேற்கொண்ட போது செய்தியாளர்களிடம் பேசிய அவர், வழக்கமான நடைமுறையின்படி, ஒவ்வொரு வாக்குச்சாவடியிலும் வாக்குகள் எண்ணப்படும் என்றும், பின்னர் அந்தந்த தொகுதிகளின் வாக்கு எண்ணிக்கை மையங்களுக்கு முடிவுகள் அனுப்பப்பட்டு, தொடர்ந்து ஆயர் குரோ பகுதியில் உள்ள விஸ்மா பெர்செகுதுவான் மையத்துக்கு அனுப்பி வைக்கப்படும் என விளக்கமளித்தார்.
மேலும், அனைத்து நடைமுறைகளும் சுமுகமாக நடைபெறும் என நம்புவதாகக் குறிப்பிட்ட அவர், முழுமையான தேர்தல் முடிவுகள் வெளியாகும் வரை பொதுமக்கள் பொறுமையுடன் காத்திருக்குமாறும், தேர்தல் ஆணையத்தின் அதிகாரப்பூர்வத் தளங்களில் தேர்தல் முடிவுகளை அறிந்து கொள்ளுமாறும் கேட்டுக் கொண்டார்.
இதற்கிடையில், மாற்றுத்திறனாளிகளாகப் பதிவு செய்துள்ள 7,000-க்கும் மேற்பட்ட வாக்காளர்கள் இதுவரை தங்களது வாக்குகளைப் பதிவு செய்துள்ளதாகவும் தெரிவித்தார்.
இது மிகவும் மகிழ்ச்சியளிக்கும் முன்னேற்றம் என்றும் ரம்லான் ஹாருன் குறிப்பிட்டார்.
