புத்ராஜெயா, மார்ச் 9 – தொழில்முனைவோர் மேம்பாடு மற்றும் கூட்டுறவு அமைச்சர் (KUSKOP) மாண்புமிகு ஸ்டீவன் சிம் சீ கியோங், புனித ரம்ழான் மாதத்தை முன்னிட்டு அமைச்சின் 535 பணியாளர்களுக்கு பேரீச்சம்பழங்களை வழங்கிச் சிறப்பித்தார்.
அமைச்சின் ஒவ்வொரு தளத்திற்கும் நேரில் சென்ற அமைச்சர், அங்குள்ள பணியாளர்களைச் சந்தித்து நலம் விசாரித்தார். இந்த முன்னெடுப்பு அமைச்சின் ஊழியர்களிடையே நல்லுறவை வலுப்படுத்துவதோடு, ஒரு குழுவாகச் செயல்படும் மனப்பான்மையை ஊக்குவிக்கும் நோக்கில் அமைந்தது.
இந்தச் சந்திப்பின் போது, பணியாளர்கள் அமைச்சருடன் நேரடியாக உரையாடவும், தங்களின் பணிச் சூழல் மற்றும் பணிகள் குறித்த கருத்துகளைப் பகிர்ந்து கொள்ளவும் வாய்ப்பு கிடைத்தது. அமைச்சின் ஒவ்வொரு பணியாளரின் அர்ப்பணிப்பையும் அங்கீகரிக்கும் வகையில் இந்த நிகழ்வு அமைந்தது. மேலும், பொதுமக்களின் கேள்விகளுக்கு நாள்தோறும் பதிலளிக்கும் அமைச்சின் அழைப்பு மையத்திற்கும் (Call Centre) சென்ற அமைச்சர், அங்குள்ள முன்வரிசைப் பணியாளர்களுக்குத் தனது வாழ்த்துகளையும் ஊக்கத்தையும் தெரிவித்தார்.
ரம்ழான் காலங்களில் பணியாளர்களுக்குப் பேரீச்சம்பழம் வழங்குவதை அமைச்சர் ஸ்டீவன் சிம் ஒரு பாரம்பரியமாகவே கடைபிடித்து வருகிறார். இந்த ஆண்டு வழங்கப்பட்ட பேரீச்சம்பழங்கள் பாலஸ்தீனத்தின் நாப்லஸ் (Nablus) பகுதியைச் சேர்ந்தவை என்பது குறிப்பிடத்தக்கது. மலேசியாவில் வசிக்கும் பாலஸ்தீனச் சமூகத்தினரால் நடத்தப்படும் 'Pasar Palestin' என்ற சிறிய கடையிலிருந்து இவை வாங்கப்பட்டுள்ளன. 2019-ஆம் ஆண்டு முதல் அமைச்சர் இந்த வணிகத்திற்குத் தொடர்ந்து ஆதரவளித்து வருகிறார். இந்தச் சிறிய முயற்சி, ரம்ழான் மாதத்தின் புனிதமான மனிதாபிமானப் பண்பையும், ஒற்றுமையையும் பறைசாற்றுகிறது.
ரம்ழான் மாதத்தின் அடிப்படை விழுமியங்களான பகிர்தல் மற்றும் கருணையை மையமாகக் கொண்டு, 'மலேசியா மதானி' (Malaysia MADANI) கோட்பாட்டிற்கு இணங்க, நாட்டில் ஒரு முழுமையான தொழில்முனைவோர் மற்றும் கூட்டுறவு சூழலை உருவாக்க KUSKOP தொடர்ந்து பாடுபடும் என்று உறுதி கூறப்பட்டுள்ளது.
