அலோர் ஸ்டார், பிப்ரவரி.03-
பாஸ் கட்சியின் ஆன்மீகத் தலைவர் ஹாஷிம் ஜாசினைத் தாம் பகிரங்கமாக விமர்சித்ததாகக் கூறப்படும் குற்றச்சாட்டுகளை அக்கட்சியின் தேர்தல் இயக்குநர் சனூசி நோர் மறுத்துள்ளார்.
சமூக ஊடகங்களில் வைரலான காணொளி ஒன்று தொடர்பாக கருத்துரைத்த அவர், பாஸ் கட்சியின் போராட்டத்தைப் பற்றிய உறுப்பினர்களின் புரிதலை வலுப்படுத்துவது பற்றியும், அவர்கள் தங்களைச் சுய பரிசோதனை செய்து கொள்வது பற்றியும் மட்டுமே தான் பேசியதாகத் தெரிவித்துள்ளார்.
அதே வேளையில், தான் யார் மீதும் தனிப்பட்ட தாக்குதல் நடத்துவது போல் பேசவில்லை என்று குறிப்பிட்டுள்ள சனூசி, தமது பேச்சு, கட்சியையும், உறுப்பினர்களையும், பாஸ் தலைமைத்துவத்தை மட்டுமே பிரதிபலிப்பதாகக் குறிப்பிட்டுள்ளார்.
முன்னதாக, காணொளி ஒன்றில், பாஸ் கட்சிக்குத் தீங்கு விளைவிக்கும் எவரும், கட்சி அரசியலமைப்பில் வெளிப்படையாகத் தடை செய்யப்படாவிட்டாலும் கூட, அவர்கள் பாஸ் கட்சியின் ஒரு பகுதியாகக் கருதப்படமாட்டார்கள் என்று சனூசி தெரிவித்திருந்தார் என்பது குறிப்பிடத்தக்கது.
