சுவா சட்டமன்றத் தொகுதி பக்காத்தான் ஹரப்பான் வேட்பாளர் டத்தோ இயூ பூன் லீ, தமக்கு எதிராக பரப்பப்படும் வாக்குக்கு பணம் கொடுத்ததாகக் கூறும் அவதூறு வீடியோ தொடர்பாக போர்ட்டிக்சன், புக்கிட் பெலண்டோக் போலீஸ் நிலையத்தில் புகார் அளித்துள்ளார்.
மாநிலத் தேர்தலை ஒட்டி, சுவா பகுதியில் மக்கள் பணம் பெற முண்டியடிப்பது போன்ற வீடியோ சமூக ஊடகங்களில் வைரலானது. வைரலான வீடியோவின் பின்னணி, இடம், நேரம் அல்லது சம்பந்தப்பட்ட நபர்களின் அடையாளம் இன்னும் உறுதி செய்யப்படவில்லை என்று இயூ பூன் லீ குறிப்பிட்டார்.
தாம் வாக்கு வாங்குவதற்காக யாருக்கும் பணம் கொடுக்கவில்லை என்றும், பண அரசியலை முற்றிலுமாக எதிர்ப்பதாகவும் அவர் திட்டவட்டமாகக் கூறியுள்ளார். போலீஸ் துறை விசாரணைக்கு முன்பே தம்மையும் பக்காத்தான் ஹராப்பான் கூட்டணியையும் இதனுடன் இணைத்து அவதூறு பரப்புவோர் மீது கடுமையான சட்ட நடவடிக்கை எடுக்கப்படும் என எச்சரித்துள்ளார்.
தேர்தல் ஆணையமும் போலீஸ் துறையும் இந்தச் சம்பவம் குறித்து விரிவான விசாரணை நடத்தி, தவறு செய்தவர்கள் மீது நடவடிக்கை எடுக்க வேண்டும் என டத்தோ இயூ பூன் லீ வலியுறுத்தியுள்ளார்.
அவதூறுகளை அரசியல் ஆயுதமாகப் பயன்படுத்தாமல், முதிர்ச்சியான ஜனநாயகத் தேர்தலை உறுதி செய்யுமாறு அவர் அனைத்துத் தரப்பினரையும் கேட்டுக் கொண்டுள்ளார்.
