கோத்தா கினபாலு, நவம்பர்.30-
சபா மாநிலத் தேர்தலுக்குப் பிறகு, அரசாங்கம் அமைப்பது குறித்து தான் தேசிய முன்னணியுடன் எந்தத் தொடர்பும் கொள்ளவில்லை என்று வாரிசான் கட்சியின் தலைவர் ஷாஃபி அப்டால் திட்டவட்டமாக மறுத்துள்ளார். தேர்தலுக்குப் பிந்தைய பேச்சுவார்த்தைகள் குறித்த வதந்திகள் பரவிய போதும், GRS தலைவர் ஹஜிஜி நூர், பெரும்பான்மை ஆதரவுடன் இன்று அதிகாலையில் இரண்டாவது முறையாக முதலமைச்சராகப் பதவியேற்றுக் கொண்டார்.
சபா உள்ளூர் கட்சிகளால் மட்டுமே ஆளப்பட வேண்டும் என்று வலியுறுத்திய ஷாஃபி, சபா மக்களின் தேவைகளை உள்நாட்டுத் தலைவர்களால் மட்டுமே புரிந்து கொள்ள முடியும் என்று சுட்டிக் காட்டியுள்ளார். கடந்த காலத்தில் ஏற்பட்ட நிலையற்ற அரசியல் சூழலைக் குறிப்பிட்டு, GRS – தேசிய முன்னணி இடையேயான தற்போதைய கூட்டணி ஐந்து ஆண்டுகளுக்கு நீடிக்குமா என்ற சந்தேகத்தையும் அவர் எழுப்பினார்.
