நெகிரி செம்பிலான் அரசியல் சாசன நெருக்கடி தீவிரமடைந்துள்ள நிலையில், பிரதமர் டத்தோ ஸ்ரீ அன்வார் இப்ராஹிம், யாங் டி பெர்துவான் பெசார் துவாங்கு முஹ்ரிஸ் துவாங்கு முனாவிரைச் சந்தித்துவிட்டு, கிட்டத்தட்ட ஒரு மணி நேரத்துக்குப் பின்னர் இஸ்தானா ஹிங்காப்பிலிருந்து புறப்பட்டார்.
கோலாலம்பூர் புக்கிட் பெர்சேகுதுவானில் உள்ள அரண்மனைக்கு இன்று மாலை சென்ற அன்வார், மாலை 6.57 மணிக்கு போலீஸ் மோட்டார் சைக்கிள் பாதுகாப்புடன் புறப்பட்டுச் சென்றார்.
நெகிரி செம்பிலானில் ஆட்சியாளரின் நிலை மற்றும் அரசியல் சாசன விவகாரம் தொடர்பாக நிலவும் பதற்றத்துக்கு மத்தியில் இந்தச் சந்திப்பு நடைபெற்றுள்ளது.
நெகிரி செம்பிலான் ஆட்சியாளரைப் பதவியிலிருந்து அகற்றுவது சாதாரண விவகாரம் அல்ல என்றும், அதற்கான அனைத்து நடவடிக்கைகளும் அரசியல் சாசனத்துக்கும் முறையான நடைமுறைகளுக்கும் முழுமையாக உட்பட்டிருக்க வேண்டும் என்றும் அன்வார் வலியுறுத்தியிருந்தார்.
இந்நிலையில், இன்று நடைபெற்ற இந்தச் சந்திப்பின் முடிவுகள் குறித்து இதுவரை அதிகாரப்பூர்வ தகவல்கள் எதுவும் வெளியிடப்படவில்லை.
