நெகிரி செம்பிலான் மாநில ஆட்சியாளர் யாங் டி பெர்துவான் பெசார் துவாங்கு முஹ்ரிஸ் துவாங்கு முனாவிர் தொடர்ந்து பதவியில் இருப்பதாக டிகேயு எனப்படும் டேவான் கெஅடிலான் டான் உண்டாங் மன்றம் அறிவித்ததை, ஜோஹோல் (Johol)உண்டாங் உள்ளிட்ட குழுவினர் நிராகரித்துள்ளனர்.
அவர்கள் நேற்று வெளியிட்ட 11 பக்க அறிக்கையில், கடந்த ஞாயிற்றுக்கிழமை டிகேயு செயலாளர் ராஜா நோரஸ்லி ராஜா நோர்டின் வெளியிட்ட 17 பக்க அறிக்கையில் முரண்பாடுகள் இருப்பதாகக் கூறினர். மேலும், கடந்த ஏப்ரல் 19ஆம் தேதி நெகிரி செம்பிலான் அரசமைப்புச் சட்டத்தின் 10 மற்றும் 29ஆவது பிரிவுகளின் அடிப்படையில் துவாங்கு முஹ்ரிஸை யாங் டி பெர்துவான் பெசார் பதவியிலிருந்து நீக்கியதாகவும் அவர்கள் மீண்டும் வலியுறுத்தினர்.
அத்துடன், கடந்த மார்ச் 5ஆம் தேதி துவாங்கு முஹ்ரிஸிடம் நேரடியாக விசாரணை நடத்தப்பட்டதாகவும், எனவே அவருக்கு உரிய வாய்ப்பு வழங்கப்படவில்லை என்ற டிகேயுவின் வாதம் ஏற்றுக் கொள்ள முடியாது என்றும் அவர்கள் தெரிவித்தனர்.
இதனிடையே, துவாங்கு முஹ்ரிஸ் தொடர்ந்து சட்டப்பூர்வமான யாங் டி பெர்துவான் பெசாராக இருப்பதாக டிகேயு தொடர்ந்து வலியுறுத்தி வருகிறது. இந்த விவகாரம் தொடர்பான சர்ச்சை சிரம்பான் நீதிமன்றத்திலும் நிலுவையில் உள்ளது.
