கட்சியில் உள்ள ஒரு பிரிவினர் பாகாத்தான் ஹராப்பானுடன் நெருக்கமான உறவுகளை ஏற்படுத்தி வருவதாக எதிர்க்கட்சித் தலைவர் ஹம்சா ஜைனுடின் கூறியிருப்பது உண்மையில்லை. அக்கூற்று ஆதாரமற்றது என பெர்சத்து கட்சித் தலைவர் டான் ஸ்ரீ முகிதீன் யாசின் தெளிவுபடுத்தியிருகிறார்.
பெரிகாத்தான் நேஷனலுடனான இணக்கமான உறவுகளைச் சீர்குலைக்கும் நோக்கிலான மோசமான கூற்று அது. அதோடு அத்தகைய ஒரு விஷயம் கட்சியின் எந்த மட்டத்திலும் விவாதிக்கப்படவில்லை என முகிதீன் குறிப்பிட்டார்.
பெர்சத்துவின் கொள்கைகள் தெளிவானவை. மதம், இனம் மற்றும் நாட்டைப் பாதுகாப்பது மற்றும் மக்களின் நலனைத் தற்காப்பது. இந்தக் கொள்கைகளை அடிப்படையாகக் கொண்டே பிற கட்சிகளுடனான பெர்சத்துவின் ஒத்துழைப்பு இருக்கிறது என அந்த முன்னாள் பிரதமர் சுட்டிக் காட்டினார்.
இதற்கு முன் பி.கே.ஆர்-ரில் இருந்து பின்னர் பெர்சத்துவில் இணைந்த ஒரு பிரிவு, PHச்சுடன் நெருக்கமான உறவுகளை ஏற்படுத்த முயற்சிப்பதாக ஹம்சா நேற்று கூறியிருந்தார். இருப்பினும் அவர் குறிப்பாக யாரையும் பெயரிடவில்லை.
கடந்த மாதம் பெர்சத்துவிலிருந்து நீக்கப்பட்ட ஹம்ஸா, பெர்சத்து பொதுச் செயலாளர் அஸ்மின் அலி, இளைஞர் பிரிவுத் தலைவர் ஹில்மான் இடாம் மற்றும் இணை பிரிவு துணைத் தலைவர் ஆர். ஸ்ரீ சஞ்சீவன் ஆகியோரிடம் இருந்து தம்மைத் தனிமைப்படுத்தி வந்ததாக நம்பப்படுகிறது. அவர்கள் அனைவரும் இதற்கு முன் பி.கே.ஆர்-ரில் இருந்தவர்கள் என்பது குறிப்பிடத்தக்கது.
