மலாக்கா மாநிலத் தேர்தலில், பெங்காலான் பத்து சட்டமன்றத் தொகுதியில் பக்காத்தான் ஹராப்பான் வேட்பாளர் ஜேசன் ட்ஸே-ஸி நாதனின் தேர்தல் பிரசாரப் பதாகைகள் திட்டமிட்டு சேதப்படுத்தப்பட்டதாகச் சந்தேகம் எழுந்துள்ளது.
கடந்த நவம்பர் 10ஆம் தேதி இரவு மேற்கொள்ளப்பட்ட ரோந்துப் பணியின்போது, சாலையோரங்களில் வைக்கப்பட்டிருந்த பல பிரசாரப் பதாகைகள் அகற்றப்பட்டு, புல்வெளியில் வரிசையாக வைக்கப்பட்டிருந்ததைக் கட்சியின் பிரசாரக் குழுவினர் கண்டறிந்தனர்.
மேலும், சில பதாகைகள் கூர்மையான பொருளால் கிழிக்கப்பட்டிருந்ததாகவும் தெரிவிக்கப்பட்டுள்ளது.
இது தொடர்பாகப் பேசிய பெங்காலான் பத்து தொகுதி பக்காத்தான் ஹராப்பான் தேர்தல் இயக்குநர் முஹமட் டனிஷ் ஸைனுடின், இத்தகைய அரசியல் நடவடிக்கைகள் ஜனநாயக உணர்வுக்கு எதிரானவை எனக் கண்டனம் தெரிவித்தார்.
மேலும், எதிர்த்தரப்பினர் உட்பட எந்தத் தரப்பினரும் இத்தகைய செயல்களில் ஈடுபடுவதைத் தவிர்த்து, கொள்கைகள் மற்றும் தேர்தல் வாக்குறுதிகள் அடிப்படையில் ஆரோக்கியமான போட்டியில் ஈடுபட வேண்டும் எனக் கேட்டுக் கொண்டார்.
இந்தச் சம்பவம் தொடர்பாகத் தமது பிரசாரக் குழுவினர் போலீசில் புகார் அளித்துள்ளதாகவும், போலீசாரும் தேர்தல் ஆணையமும் விசாரணை மேற்கொண்டு பொறுப்பானவர்களைக் கண்டறிய வேண்டும் என்றும் அவர் வலியுறுத்தினார்.
