பெரிக்காத்தான் நேஷனல் தலைமைத்துவம் தனது தோல்விகளை மறைப்பதற்காக, மலேசிய சங்கங்களின் பதிவாளர் அலுவலகமான ஆர்ோஎஸ்ஸின் பங்கை ஆதாரமற்ற குற்றச்சாட்டுகள் மூலம் சிறுமைப்படுத்தக்கூடாது என்று பெர்சத்து கட்சியின் தலைமைச் செயலாளர் டத்தோ ஶ்ரீ முஹமட் அஸ்மின் அலி தெரிவித்துள்ளார்.
பெரிக்காத்தான் நேஷனல் தனது நடவடிக்கைகளை சங்கங்கள் சட்டம் 1966 மற்றும் கூட்டணியின் அரசியலமைப்புக்கு ஏற்ப நடத்துமாறு ஆர்ஓஎஸ் பலமுறை எழுத்துப்பூர்வமாக நினைவூட்டியதாக அவர் கூறினார்.
கடந்த ஆகஸ்ட் 11ஆம் தேதி, பெரிக்காத்தான் நேஷனல் புதிய தலைமைத்துவத்தால் கூட்டணியின் அரசியலமைப்பு மீறப்பட்டதாகக் கூறி, பெர்சத்து ஆர்ஓஎஸ்-இடம் புகார் அளித்ததாகவும் அஸ்மின் தெரிவித்தார்.
ஜூலை 16ஆம் தேதி நடைபெற்ற பெரிக்காத்தான் நேஷனல் உச்ச மன்றக் கூட்டத்தில் பெர்சத்துவுக்கு கலந்து கொள்ளவும், கருத்துத் தெரிவிக்கவும், வாக்களிக்கவும் உரிமை மறுக்கப்பட்டது அந்தக் கூட்டணியின் அரசியலமைப்பை மீறிய செயல் என்றும் அவர் கூறினார்.
பெரிக்காத்தான் நேஷனல் மீது ஆர்ஓஎஸ் எடுத்த நடவடிக்கைக்கு அரசியல் அழுத்தம் காரணமாக இருக்கலாம் என்று கூட்டணியின் பொதுச் செயலாளர் டத்தோ ஶ்ரீ தக்கியுடின் ஹசான் கூறியிருந்த நிலையில், அதனை அஸ்மின் மறுத்துள்ளார்.
