கோலாலம்பூர், பிப்ரவரி.11-
கோலாலம்பூரில் நடைபெற்ற Asian Model Icon அனைத்துலகப் போட்டியில், சரவாக் மாநிலத்தைச் சேர்ந்த 53 வயதான ராணி ராமதாசு மகுடம் சூடி வியப்பில் ஆழ்த்தியுள்ளார். 19 முதல் 70 வயது வரையிலான சுமார் 18 இளம் போட்டியாளர்களை முந்தி அவர் பெற்ற இந்த வெற்றி, வயது என்பது வெறும் எண்களே என்பதை உலகிற்கு பறைசாற்றியுள்ளது. ஒரு பகுதிநேர மனிதவள ஆலோசகரான ராணி, "மேடையில் நடப்பதும், தன்னம்பிக்கையுடன் மிளிர்வதும் 50 வயதைக் கடந்த பெண்களாலும் சாத்தியமே" என்பதை இந்த வெற்றியின் மூலம் உறுதிப்படுத்தியுள்ளார்.
இந்த அபார வெற்றிக்கு ராணி ராமதாசு சிறுவயதில் மேற்கொண்ட தடகளப் பயிற்சியும் மற்றும் 13 வயதிலிருந்து பயின்ற இந்திய பாரம்பரிய நடனமுமே ஆணிவேராக அமைந்தன. விளையாட்டில் கிடைத்த மன உறுதியும், நடனத்தில் கற்ற நளினமான உடல்மொழியும் அவரை மேடையில் ஒரு முழுமையான ஆளுமையாக வெளிப்படுத்தின. வெறும் மகுடத்திற்காக அல்லாமல், தனது வாழ்நாள் கனவான Runway Walk பயணத்தை நனவாக்கவே அவர் இதில் பங்கேற்றார். சமூகத்தின் வயோதிகம் குறித்த பார்வையை உடைத்து, பல பெண்களுக்கு உத்வேகம் அளிக்கும் ஒரு அடையாளமாக ராணி ராமதாசு இன்று உருவெடுத்துள்ளார்.
