தீபாவளிப் பண்டிகையை முன்னிட்டு, பினாங்கு மாநில வீடமைப்பு மற்றும் சுற்றுச்சூழல் ஆட்சிக்குழு உறுப்பினரும் பிறை சட்டமன்ற உறுப்பினருமான டத்தோ ஸ்ரீ சுந்தராஜு சோமு, பிறை சட்டமன்றத் தொகுதியைச் சேர்ந்த 1,200 பயனாளிகளுக்கு தீபாவளி அன்பளிப்புகளை வழங்கினார்.
பிறை சாய் லெங் பார்க் பல்நோக்கு மண்டபத்தில் நடைபெற்ற இந்நிகழ்ச்சி, பிறை சட்டமன்றத் தொகுதி சேவை மையத்தின் ஏற்பாட்டில் நடைபெற்றது.
இந்நிகழ்ச்சி இவ்வாண்டு மூன்றாவது ஆண்டாக நடத்தப்படுவதாகக் குறிப்பிட்ட டத்தோ ஸ்ரீ சுந்தராஜு சோமு, கடந்த ஆண்டு 1,000 பேருக்கு வழங்கப்பட்ட அன்பளிப்புகள், இவ்வாண்டு 1,200 பேருக்கு விரிவுபடுத்தப்பட்டுள்ளதாகத் தெரிவித்தார்.
இந்நிகழ்ச்சியில், முன்பதிவு செய்து தகுதி பெற்ற ஒவ்வொரு பயனாளிக்கும் சுமார் 120 ரிங்கிட் மதிப்பிலான அன்பளிப்புகள் வழங்கப்பட்டன.
“இந்த உதவி பெரிய அளவிலானதாக இல்லாவிட்டாலும், இதைப் பெற்றுக் கொண்ட மக்களின் முகங்களில் காணப்பட்ட மகிழ்ச்சியும் புன்னகையும் எனது மனதை நெகிழச் செய்தன. தீபாவளிக் காலத்தில் குடும்பங்களின் செலவுச் சுமையைக் குறைக்க இந்த உதவி ஓரளவு துணையாக இருக்கும். இதற்காகப் பலரும் தங்களது நன்றியையும் பாராட்டையும் தெரிவித்தனர்,” என்று டத்தோ ஸ்ரீ சுந்தராஜு குறிப்பிட்டார்.
மேலும், பிறை சட்டமன்ற உறுப்பினர் என்ற முறையில் இனம், மதம் பாராமல் அனைத்துத் தரப்பு மக்களின் நலனுக்காகவும் தொடர்ந்து அர்ப்பணிப்புடன் சேவையாற்றுவது தனது கடமை என்றும் அவர் குறிப்பிட்டார்.
இத்தகைய சமூகநல முயற்சிகள் அன்பு, ஒற்றுமை மற்றும் சமூக நல்லிணக்கத்தை வலுப்படுத்தும் நோக்கில் தொடர்ந்து முன்னெடுக்கப்படும் என்றும் அவர் தெரிவித்தார்.
