கோத்தா கெமுனிங் சட்டமன்றத் தொகுதியில் தீபாவளியை முன்னிட்டு நடைபெற்ற ஜோம் ஷோப்பிங் உதவித் திட்டத்தின் மூலம் இவ்வாண்டு 750 பேர் பயனடைந்தனர்.
கோத்தா கெமுனிங் சட்டமன்ற உறுப்பினர் பிரகாஷ் சம்புநாதன் தலைமையில் இன்று நடைபெற்ற இத்திட்டத்தில், கடந்த ஆண்டு நிர்ணயிக்கப்பட்ட 500 பேர் என்ற எண்ணிக்கையுடன் கூடுதலாக 250 பேர் சேர்க்கப்பட்டு, பயனாளிகளின் எண்ணிக்கை 750 ஆக உயர்த்தப்பட்டுள்ளது.
தீபாவளிக்கான பொருட்களை வாங்குவதற்கு வழங்கப்பட்ட இந்த உதவி, தேவையுள்ள குடும்பங்களின் பண்டிகை காலச் செலவுகளைக் குறைத்து, அவர்கள் மகிழ்ச்சியுடன் தீபாவளியைக் கொண்டாட உதவும் என்று எதிர்பார்க்கப்படுகிறது.
இதனிடையே, ஜோம் ஷோப்பிங் திட்டத்தைத் தவிர, உணவுப் பொருள் கூடைகள் வழங்குதல், சமூக நலச் சந்திப்புகள் உள்ளிட்ட பல்வேறு உதவித் திட்டங்களும் தொகுதியில் முன்னெடுக்கப்பட்டு வருகின்றன என்று பிரகாஷ் சம்புநாதன் தெரிவித்தார்.
அடுத்த கட்டமாக, பெகாவிஸ் (PEKAWIS) திட்டமும் விரைவில் செயல்படுத்தப்படவுள்ளது. இதன் மூலம் உதவி தேவைப்படும் மக்களைச் சென்றடையும் சமூகநல நடவடிக்கைகள் மேலும் விரிவுபடுத்தப்படும்.
இவ்வாண்டு செயல்படுத்தப்படும் பல்வேறு நலத்திட்டங்கள் மூலம் மொத்தம் சுமார் 1,000 பேர் பயனடைவார்கள் என்று பிரகாஷ் சம்புநாதன் நம்பிக்கை தெரிவித்தார்.
