லாபுவான், ஜூன்.14-
லாபுவானின் வீற்றிருக்கும் திருமுருகன் கோவிலுக்கு கோலாலம்பூர் ஸ்ரீ மகா மாரியம்மன் கோயில் தேவஸ்தானத்தின் தலைவர் டான்ஸ்ரீ டத்தோ டாக்டர் ஆர். நடராஜா அதிகாரப்பூர்வ வருகையை மேற்கொண்டார்.
மலேசிய இந்து கோவில்கள் மற்றும் இந்து அமைப்புகள் பேரவையான மஹிமாவின் ஆலோசகருமான டான்ஸ்ரீ நடராஜா, லாபுவான் திருமுருகன் கோவிலின் தலைவர் சுப்பிரமணியம் மற்றும் கோவில் நிர்வாகத்தினரின் அழைப்பின் பேரில் அக்கோவிலில் நடைபெற்ற சிறப்பு நிகழ்வில் கலந்து கொண்டார்.
இவ்வருகையின் போது கோவிலில் நடைபெற்று வரும் மேம்பாட்டிற்கு ஆதரவு நல்கும் வகையில் டான் ஸ்ரீ நடராஜா 10 ஆயிரம் ரிங்கிட் நிதி உதவியை வழங்கினார்.
டான்ஸ்ரீ நடராஜாவுடன் இவ்வருகையில் பங்கு கொண்ட மஹிமாவின் தலைவரான டத்தோ என. சிவகுமார் கூறுகையில், தேவார வகுப்புகள், இந்து சமயக் கல்வி மற்றும் கோயில் நூலகத்தை நிறுவுதல் உள்ளிட்ட கோயிலின் அழகிய உள்கட்டமைப்பு மற்றும் சமூகத்திற்கு திருமுருகன் ஆலயம் ஆற்றி வரும் பங்களிப்பை, வெகுவாகப் பாராட்டினார்.
மலேசிய இந்து கோவில்கள் மற்றும் இந்து அமைப்புகளின் பேரவையில் இணைவதற்கான உறுதிப்பாட்டைக் குறிக்கும் வகையில், கோவில் நிர்வாகத்தினர் மஹிமாவின் இணைவதற்கான விண்ணப்பத்தை சமர்ப்பித்தனர்.
