எல் கிளாசிகோ' கால்பந்து போட்டிக்கு முன்னதாக, பார்சிலோனா அணியின் நட்சத்திர வீரர்களான லமைன் யமால் மற்றும் ரஃபின்ஹா ஆகியோர் காயத்தால் விலகியுள்ளது அந்த அணிக்குப் பெரும் பின்னடைவை ஏற்படுத்தியுள்ளது.
பார்சிலோனா அணியின் இளம் நம்பிக்கை நட்சத்திரமான 18 வயது லமைன் யமால், செல்டா விகோ அணிக்கு எதிரான போட்டியின் போது தசைநார் காயத்தால் பாதிக்கப்பட்டுள்ளார். இதனால் அவர் இந்த சீசனின் எஞ்சிய போட்டிகளில் விளையாட மாட்டார் என்று அறிவிக்கப்பட்டுள்ளது. இந்த சீசனில் இதுவரை 24 கோல்கள் மற்றும் 18 அசிஸ்ட்களைப் பதிவு செய்துள்ள யமாலின் விலகல், பார்சிலோனாவின் பலத்தைக் குறைத்துள்ளது. அதேபோல் மற்றொரு முக்கிய வீரரான ரஃபின்ஹாவும் காயமடைந்துள்ளதால், வரும் சனிக்கிழமை கெடாஃபே அணிக்கு எதிரான போட்டியில் அவர் பங்கேற்க மாட்டார்.
ஸ்பானிஷ் லா லிகா தொடரில் பார்சிலோனா அணி தற்போது ரியல் மாட்ரிட்டை விட 9 புள்ளிகள் முன்னிலையில் இருந்தாலும், முக்கிய வீரர்களின் காயம் ரியல் மாட்ரிட் அணிக்குச் சாதகமாகப் பார்க்கப்படுகிறது. மே 10-ஆம் தேதி நடைபெறவுள்ள 'எல் கிளாசிகோ' போட்டியில் ரியல் மாட்ரிட் வெற்றி பெற்றால், பார்சிலோனாவின் முன்னிலையைக் குறைத்து சாம்பியன் பட்டத்தை வெல்லும் வாய்ப்பு அவர்களுக்குக் கிடைக்கும். பார்சிலோனா பயிற்சியாளர் ஹன்சி பிளிக், இந்தச் சவால்களைச் சமாளித்து அணியின் முன்னிலையைத் தக்கவைக்கத் தீவிர ஆலோசனையில் ஈடுபட்டுள்ளார்.
