லா லிகா கால்பந்து போட்டியில் ரியல் மாட்ரிட் அணி 2-0 என்ற கோல் கணக்கில் ரியல் ஓவியெடோ அணியைத் தோற்கடித்தது. இந்த வெற்றியின் போது, ரியல் மாட்ரிட் ரசிகர்களின் அதிருப்திக்கு நட்சத்திர வீரர் கிலியன் எம்பாப்பே ஆளானார்.
பார்சிலோனா அணியிடம் லீக் பட்டத்தை இழந்த கோபத்தில் இருந்த ரியல் மாட்ரிட் ரசிகர்கள், சாண்டியாகோ பெர்னபாப் மைதானத்தில் தங்கள் சொந்த அணி வீரர்களுக்கு எதிராகவே விசிலடித்து தங்களின் எதிர்ப்பைக் காட்டினர். காயம் காரணமாக அண்மையில் ஓய்வில் இருந்த கிலியன் எம்பாப்பே, இந்த ஆட்டத்தின் 69-வது நிமிடத்தில் மாற்று வீரராகக் களமிறங்கியபோது மைதானத்தில் இருந்த ரசிகர்களில் ஒரு பகுதியினர் அவருக்கு எதிராகக் கூச்சலிட்டனர். எனினும், ஆட்டத்தின் 43-வது நிமிடத்தில் கோன்சலோ கார்சியாவும், 79-வது நிமிடத்தில் கிலியன் எம்பாப்பேயின் உதவியோடு ஜூட் பெல்லிங்ஹாமும் கோல் அடித்து அணியின் வெற்றியை உறுதி செய்தனர்.
