ஜப்பானின் நகோயாவில் நடைபெறும் 2026 ஆசிய விளையாட்டுப் போட்டியில், ஹாங்காங்கை 2-1 என்ற கணக்கில் வீழ்த்தி மலேசிய மகளிர் ஸ்குவாஷ் அணி தங்கப் பதக்கத்தைத் தக்கவைத்துக் கொண்டது.
நகோயா கின்ஜோ ஃபுடோ அரங்கில் நடைபெற்ற இறுதிப் போட்டியின் வெற்றி, மலேசியாவுக்கு போட்டியில் ஏழாவது தங்கப் பதக்கத்தைப் பெற்றுத் தந்தது.
முதல் ஆட்டத்தில் அய்ஃபா அஸ்மான் 11-9, 11-9, 12-10 என்ற புள்ளிகளில் ஹாங்காங்கின் ஹோ ஸீ லோக்கை வீழ்த்தி மலேசியாவை முன்னிலைப்படுத்தினார்.
இரண்டாவது ஆட்டத்தில் உலகின் ஐந்தாம் நிலை வீராங்கனையான எஸ். சிவசங்கரி, சான் சின் யுக்கிடம் 7-11, 11-9, 11-9, 5-11, 7-11 என்ற புள்ளிகளில் போராடி தோல்வியடைந்ததால் போட்டி 1-1 என சமநிலையானது.
வெற்றியை தீர்மானிக்கும் மூன்றாவது ஆட்டத்தில் களமிறங்கிய அய்ரா அஸ்மான், லீ கா யீயை 11-9, 11-5, 11-4 என்ற நேர் செட்களில் வீழ்த்தி மலேசியாவின் தங்கத்தை உறுதி செய்தார்.
இதன் மூலம் ங் இயன் யோவ், எஸ். சிவசங்கரி ஆகியோர் தனிநபர் பிரிவுகளில் வென்ற தங்கங்களுடன், ஆசிய விளையாட்டில் ஸ்குவாஷ் மூலம் மலேசியா பெற்ற தங்கப் பதக்கங்களின் எண்ணிக்கை மூன்றாக உயர்ந்துள்ளது.
