அடுத்த ஆண்டு லே டுவர் டே லங்காவி எனப்படும் எல்டிடிஎல் சைக்கிள் பந்தயத்தை மீண்டும் லங்காவிக்கு கொண்டு வர அனைத்து முயற்சிகளையும் மேற்கொள்வதாக இளைஞர் மற்றும் விளையாட்டுத் துறை அமைச்சர் டாக்டர் தௌஃபிக் ஜோஹாரி தெரிவித்துள்ளார்.
இந்த ஆண்டு பந்தயத்தில் லங்காவி இடம்பெறாததற்கு வரவு செலவுத் திட்டக் கட்டுப்பாடுகள், குறிப்பாக போக்குவரத்துச் செலவு அதிகமாக இருந்தது காரணம் என அவர் கூறினார். இந்த விவகாரம் தொடர்பாக கெடா மாநில அரசுக்கும் தகவல் தெரிவிக்கப்பட்டதாக அவர் குறிப்பிட்டார்.
2027ஆம் ஆண்டு லங்காவியை எல்டிடிஎல் பந்தயத்தில் இணைத்து, லங்காவி நாடாளுமன்ற உறுப்பினரையும் பந்தய நிகழ்வுகளுடன் இணைக்க நடவடிக்கை எடுப்பதாக தௌஃபிக் தெரிவித்தார். லங்காவி விளையாட்டு மற்றும் விளையாட்டு சுற்றுலாவுக்கான முக்கிய இடமாக உருவாக்கப்படும் என்றும் அவர் கூறினார்.
இந்த ஆண்டு எல்டிடிஎல் செப்டம்பர் 27 முதல் அக்டோபர் 4 வரை நடைபெற்றது. தீபகற்ப மலேசியாவின் 8 மாநிலங்கள் வழியாக 8 கட்டங்களாக நடைபெற்ற இந்தப் பந்தயம் மொத்தம் 1,258.5 கிலோமீட்டர் தூரத்தைக் கொண்டிருந்தது.
