உலகக் கோப்பை கால்பந்து போட்டிக்காகப் பள்ளிக் கல்வி ஆண்டைக் குறைக்க மெக்சிகோ அரசு எடுத்த முடிவிற்குப் பெற்றோர்கள் மற்றும் பல்வேறு அமைப்புகளிடம் இருந்து கடும் எதிர்ப்பு கிளம்பியதையடுத்து, அந்தத் திட்டம் தற்போது ரத்து செய்யப்பட்டுள்ளது.
மெக்சிகோ, அமெரிக்கா மற்றும் கனடா ஆகிய நாடுகள் இணைந்து நடத்தும் உலகக் கோப்பை தொடர் வரும் ஜூன் 11-ஆம் தேதி தொடங்க உள்ளது. இதைக் கருத்தில் கொண்டும், நிலவி வரும் கடும் வெப்ப அலை காரணமாகவும், கல்வி ஆண்டை 40 நாட்களுக்கு முன்னதாகவே அதாவது ஜூன் 5-ஆம் தேதியுடன் முடிக்க மெக்சிகோ கல்வி அமைச்சு முதலில் திட்டமிட்டிருந்தது. இருப்பினும், இந்த முடிவால் சுமார் 2.3 கோடி மாணவர்கள் கல்வியில் பின்தங்கும் நிலை ஏற்படும் என்றும், கற்றல் நேரம் பெருமளவு குறையும் என்றும் கல்வி ஆய்வாளர்களும் பெற்றோர்களும் கவலை தெரிவித்தனர். இது தொடர்பான ஆலோசனைக் கூட்டத்திற்குப் பிறகு, ஏற்கனவே திட்டமிட்டபடி ஜூலை 15-ஆம் தேதி வரை பள்ளிகள் செயல்படும் என்றும், அதன் பிறகு 6 வார கால விடுமுறைக்குப் பின் ஆகஸ்ட் 31-ஆம் தேதி புதிய கல்வி ஆண்டு தொடங்கும் என்றும் அதிகாரப்பூர்வமாக அறிவிக்கப்பட்டுள்ளது.
மெக்சிகோ அதிபர் கிளாடியா ஷீன்பாம் இந்த விவகாரத்தில் தலையிட்டு, மாணவர்களின் கல்வி நலன் பாதிக்கப்படாத வகையில் ஒருமித்த கருத்து எட்டப்பட வேண்டும் என்று வலியுறுத்தியதைத் தொடர்ந்து இந்த மாற்றம் செய்யப்பட்டுள்ளது.
