மலேசிய நேரப்படி நாளை அதிகாலை நடைபெறவுள்ள இந்த ஆட்டம், சாம்பியன்ஸ் லீக் தொடரின் ஒரு 'மினி ஃபைனல்' என்றே அழைக்கப்படுகிறது. 2012-ஆம் ஆண்டிற்குப் பிறகு ரியல் மெட்ரிட் அணியை ஒருமுறை கூட வீழ்த்தாத பயர்ன் முனிச், இம்முறை ஹாரி கேன் மற்றும் இளம் வீரர் மைக்கேல் ஒலிசே ஆகியோரின் துணையுடன் அந்தச் சாபத்தை முறியடிக்கத் திட்டமிட்டுள்ளது.
"நாங்கள் ரியல் மெட்ரிட் அணியின் சாதனைகளை மதிக்கிறோம், ஆனால் களத்தில் எங்களது பலத்தைக் காட்டுவோம்" எனப் பயர்ன் முனிச் விளையாட்டு இயக்குநர் மேக்ஸ் எபெர்ல் தெரிவித்துள்ளார். கால்பந்து ரசிகர்கள் அனைவரும் இந்த வார இறுதியில் ஒரு மிகச்சிறந்த விளையாட்டு விருந்தை எதிர்பார்க்கலாம்.
