பினாங்கு மாநிலத்திலுள்ள தமிழ்ப்பள்ளிகளின் அடிப்படை வசதிகளை மேம்படுத்தும் நோக்கில், பினாங்கு மாநில தமிழ்ப்பள்ளிகளின் சிறப்பு நடவடிக்கைக்குழுவின் சார்பில் மொத்தம் 3 லட்சத்து 45 ஆயிரத்து 486 ரிங்கிட் மதிப்பிலான 2,433 செட் மேசை மற்றும் நாற்காலிகள் வழங்கும் திட்டம் தொடங்கப்பட்டுள்ளது.
இந்தத் திட்டத்தின் தொடக்கமாக, வடகிழக்கு மற்றும் தென்மேற்கு மாவட்ட தமிழ்ப்பள்ளிகளுக்கான மேசை, நாற்காலிகள் வழங்கும் நிகழ்வை பினாங்கு மாநில தமிழ்ப்பள்ளிகளின் சிறப்பு நடவடிக்கைக்குழுத் தலைவரும் மாநில ஆட்சிக்குழு உறுப்பினருமான டத்தோஸ்ரீ சுந்தராஜு சோமு அதிகாரப்பூர்வமாகத் தொடங்கி வைத்தார்.
பினாங்கு மாநிலத்தின் தமிழ்ப்பள்ளிகளில் மாணவர்களுக்குக் கூடுதல் வசதியான மற்றும் தரமான கற்றல் சூழலை உருவாக்குவதே இத்திட்டத்தின் முக்கிய நோக்கமாகும். இதன் முதற்கட்டமாக, 2026-ஆம் ஆண்டிற்கான மாணவர் எண்ணிக்கையின் அடிப்படையில் தகுதியுள்ள பள்ளிகளுக்கு 500 செட் மேசை மற்றும் நாற்காலிகள் வழங்கப்பட்டுள்ளன. மாநிலம் தழுவிய அளவில் இந்த விநியோகம் அடுத்தடுத்த கட்டங்களாகத் தொடரும் என அவர் குறிப்பிட்டார்.
தரமான தளவாடங்களை வழங்குவது வெறும் உடல் ரீதியான தேவை மட்டுமல்ல, அது மாணவர்களின் கல்வித் திறனை மேம்படுத்துவதிலும், வகுப்பறைச் சூழலைச் சீரமைப்பதிலும் முக்கியப் பங்கு வகிக்கும் ஒரு முதலீடு என்று டத்தோஸ்ரீ சுந்தராஜு சோமு தெரிவித்தார். கல்வியில் சமத்துவத்தை உறுதி செய்யவும், எந்தவொரு மாணவரும் பின்தங்கிவிடக் கூடாது என்ற மாநில அரசின் இலக்கிற்கு ஏற்ப இத்திட்டம் அமைகிறது என்றும் அவர் வலியுறுத்தினார்.
இந்தச் சிறப்பான முயற்சியை முன்னெடுத்துச் சென்ற தமிழ்ப்பள்ளிகளின் சிறப்பு நடவடிக்கைக்குழு உறுப்பினர்களுக்கும், குறிப்பாகத் திட்டத்தை மிகுந்த தொழில்முறை மற்றும் நேர்மையுடன் வழிநடத்திய குழுவின் துணைத் தலைவர் குமரன் கிருஷ்ணனுக்கும் டத்தோஸ்ரீ சுந்தராஜு சோமு தனது மனமார்ந்த பாராட்டுகளைத் தெரிவித்துக் கொண்டார்.
