சீனாவிற்குச் சுற்றுலாச் சென்ற இரு அமெரிக்கப் பயணிகள், அங்கு நடைபெற்ற ஒரு முதியவரின் 'மகிழ்ச்சியான இறுதிச் சடங்கை' நவீன உணவகம் எனத் தவறாகப் புரிந்துகொண்டு உள்ளே நுழைந்த சம்பவம் சமூக வலைதளங்களில் வைரலாகி வருகிறது.
பிரபல அமெரிக்க யூடியூபரான லுட்விக் அஹ்ரென் தனது நண்பருடன் சீனாவில் மோட்டார் சைக்கிள் பயணம் மேற்கொண்டிருந்தார். ஹுனான் மாகாணத்தில் உள்ள ஒரு கிராமத்தின் வழியாகச் சென்றபோது, சிவப்பு நிற அலங்கார விளக்குகள் மற்றும் பெரிய கூட்டத்தைக் கண்டு அது ஏதோ ஒரு பிரபலமான உணவகம் என்று அவர்கள் நினைத்தனர். பசியுடன் இருந்த அவர்கள், அங்கிருந்தவர்களிடம் "நாங்கள் இங்கு சாப்பிடலாமா?" என்று அரைகுறை சீன மொழியில் கேட்டுள்ளனர்.
உண்மையில், அது 104 வயது வரை வாழ்ந்த ஒரு முதியவருக்காக நடத்தப்பட்ட 'மகிழ்ச்சியான இறுதிச் சடங்கு' ஆகும். சீன கலாச்சாரத்தில் 90 வயதிற்கு மேல் வாழ்ந்தவர்கள் இறக்கும் போது, அவர்களது வாழ்வைக் கொண்டாடும் விதமாக இத்தகைய விழாக்கள் நடத்தப்படுவது வழக்கம். அங்கிருந்த உள்ளூர்வாசி ஒருவர், அவர்களுக்கு நிலைமையை விளக்கிச் சொல்ல முயன்றார். ஆனால் மொழிப் பிரச்சனையால் அவர்கள் முதலில் அதைத் தவறாகப் புரிந்துகொண்டனர். இருப்பினும், அந்த ஊர் மக்கள் அவர்களை இன்முகத்துடன் வரவேற்று, பின்னர் தனது வீட்டிற்கே அழைத்துச் சென்று அறுசுவை உணவளித்து உபசரித்துள்ளனர். இந்த நெகிழ்ச்சியான அனுபவத்தைக் குறித்து லுட்விக் வெளியிட்ட காணொளி தற்போது ஒரு மில்லியனுக்கும் அதிகமான பார்வைகளைப் பெற்று வைரலாகி வருகிறது.
