மியன்மாரில் நீடித்த அமைதியை ஏற்படுத்தும் முயற்சிகளுக்கு மலேசியா துணை நிற்கத் தயாராக இருப்பதாக பிரதமர் டத்தோ ஶ்ரீ அன்வார் இப்ராஹிம் தெரிவித்துள்ளார்.
மியன்மார் அதிபர் மின் அவுங் லாயிங்குடனான இருதரப்பு சந்திப்புக்குப் பின்னர் இதனைத் தெரிவித்த அன்வார், மியன்மாரில் அமைதி மற்றும் நல்லிணக்க முயற்சிகள் வெற்றி பெற அனைத்து தரப்பினரையும் உள்ளடக்கிய பேச்சுவார்த்தை அவசியம் என்றார்.
இரு நாடுகளுக்கும் இடையிலான வர்த்தகம், பொருளாதாரம், எரிசக்தி மற்றும் பாதுகாப்பு உள்ளிட்ட விவகாரங்களுடன், எல்லை தாண்டிய குற்றங்களைத் தடுப்பது குறித்தும் பேச்சுவார்த்தையில் விவாதிக்கப்பட்டதாக அவர் கூறினார்.
மியன்மார் நாட்டினரைத் தன்னார்வ அடிப்படையில், பாதுகாப்பாகவும் கண்ணியத்துடனும் நாடு திரும்பச் செய்வது குறித்தும் ஆலோசிக்கப்பட்டதாக அன்வார் தெரிவித்தார்.
