சீனாவின் லியோனிங் மாகாணத்தில் உள்ள ஒரு கிராமத்தில், மறைந்த ஒருவரின் நினைவாக அவரது குடும்பத்தினர் சுமார் 1.1 மில்லியன் யுவான் சுமார் 6.5 லட்சம் ரிங்கிட் மதிப்புள்ள சொகுசு மெர்சிடிஸ் பென்ஸ் காரைப் புதைத்த சம்பவம் பெரும் பரபரப்பை ஏற்படுத்தியுள்ளது.
கடந்த ஏப்ரல் 9, 2026 அன்று நடைபெற்ற இந்த வினோதமான இறுதிச் சடங்கின் வீடியோ சமூக வலைதளங்களில் வைரலாகியது. அதில், ஒரு அகழ்வாராய்ச்சி இயந்திரம் மூலம் கறுப்பு நிற சொகுசு கார் ஒன்று கல்லறைக்குள் இறக்கப்படுவதைக் காணலாம். மறைந்த அந்த நபர் உயிருடன் இருந்தபோது கார்கள் மீது மிகுந்த ஆர்வம் கொண்டிருந்ததால், அவரது ஆத்மா சாந்தியடைய வேண்டும் என்பதற்காக அவரது பிள்ளைகள் இந்தச் செயலைச் செய்ததாகக் கூறப்படுகிறது. அந்தக் காரில் செல்வம் மற்றும் அதிர்ஷ்டத்தைக் குறிக்கும் '88888' என்ற சிறப்பான பதிவு எண்ணும் பொருத்தப்பட்டிருந்தது.
இருப்பினும், இந்தச் சம்பவம் சீன அரசாங்கத்தின் கவனத்திற்குச் சென்றதையடுத்து, "மூடநம்பிக்கை மற்றும் வீண் ஆடம்பரம்" என்று கூறி உள்ளூர் அதிகாரிகள் அந்தக் குடும்பத்தைக் கடுமையாகக் கண்டித்துள்ளனர். மேலும், காரை முறையாகச் சிதைக்காமல் புதைப்பது நிலத்தடி நீரை மாசுபடுத்தும் மற்றும் நிலப் பயன்பாட்டு விதிகளை மீறும் செயல் என்று எச்சரிக்கப்பட்டுள்ளது. இதனைத் தொடர்ந்து, சம்பந்தப்பட்ட நபர் தனது தவறுக்காகப் பகிரங்கமாக மன்னிப்பு கோரியுள்ளார். புதைக்கப்பட்ட கார் தற்போது தோண்டி எடுக்கப்பட்டுள்ளதாகத் தகவல்கள் தெரிவிக்கின்றன.
